PM Narendra Modi on War: વડાપ્રધાન નરેન્દ્ર મોદી શુક્રવારે સાંજે રાજ્ય સહિત કેન્દ્રશાસિત પ્રદેશોના મુખ્યમંત્રી સાથે વીડિયો કોન્ફરન્સના માધ્યમથી વાતચીત કરશે. આ બેઠકમાં પશ્ચિમ એશિયાની હાલતની સમીક્ષા કરવામાં આવશે અને તેના લીધે ભારત પર થનારી અસરોનું આંકલન કરવામાં આવશે. ખાસ કરીને, ગેસ અને તેલના મુદ્દે ચર્ચા કરવામાં આવશે.

આ બેઠકમાં પુરવઠો, ઉર્જા સુરક્ષા અને વિદેશમાં રહેતા ભારતીય નાગરિકોની સલામતી જેવા મુદ્દાઓ સહિત તૈયારીઓ પર ચર્ચા કરવામાં આવશે. પ્રધાનમંત્રી "ટીમ ઇન્ડિયા"ની ભાવનામાં સામુહિક પ્રતિભાવના મહત્વ પર ભાર મૂકે તેવી અપેક્ષા છે, જે કેન્દ્ર અને રાજ્યો વચ્ચે સંકલન સુનિશ્ચિત કરે છે. 

આ બેઠકમાં વૈશ્વિક અનિશ્ચિતતા વચ્ચે દેશમાં સ્થિરતા જાળવવાના પગલાં અંગે પણ ચર્ચા થવાની અપેક્ષા છે. હાલમાં ચૂંટણી યોજી રહેલા રાજ્યો આચારસંહિતાના કારણે ભાગ લેશે નહીં. તેના બદલે, આયોજન અને પ્રતિભાવ પ્રક્રિયા ચાલુ રહે તે સુનિશ્ચિત કરવા માટે કેબિનેટ સચિવાલય દ્વારા તેમના મુખ્ય સચિવો સાથે અલગથી બેઠકો યોજવામાં આવશે. 

આ બેઠક એટલા માટે પણ મહત્વપૂર્ણ માનવામાં આવે છે, કારણ કે, ભારત હાલમાં LPGની અછતનો સામનો કરી રહ્યું છે, જે ઘરોમાં વપરાતા આવશ્યક બળતણના પુરવઠાને અસર કરી રહ્યું છે. ઈરાને મોટાભાગના દેશો માટે હોર્મુઝ સ્ટ્રેટ બંધ કરી દીધું છે, જો કે ભારતને આમાંથી મુક્તિ આપવામાં આવી છે. તેમ છતાં, એવી ચિંતા છે કે ભવિષ્યમાં પરિસ્થિતિ વધુ મુશ્કેલ બની શકે છે. 

ભારત પાસે 60 દિવસનું ઇંધણ છે: સરકાર
આજે સરકારે નાગરિકોને ખાતરી આપી હતી કે, પશ્ચિમ એશિયામાં વધતા તણાવ છતાં તાત્કાલિક કોઈ ખતરો નથી. સરકારે જણાવ્યું હતું કે, દેશમાં 60 દિવસનું ઇંધણ ઉપલબ્ધ છે. લોકોને ઇંધણની અછત અંગેની અટકળો પર ધ્યાન ન આપવા વિનંતી કરવામાં આવી હતી. સરકારે ખાતરી આપી હતી કે, દેશનો ઉર્જા પુરવઠો સ્થિર અને સુવ્યવસ્થિત છે અને વર્તમાન માંગને પહોંચી વળવા માટે પૂરતો ભંડાર અસ્તિત્વમાં છે.