Navsari News: વાંસદાના ખાનપુરમાં 85 ફૂટ ઊંચા રાવણ દહનનું ભવ્ય આયોજન, 20,000 શ્રદ્ધાળુઓ ઉમટવાની શક્યતા

આ વર્ષે પણ મંડળ દ્વારા આશરે 85 ફૂટ ઊંચા ભવ્ય રાવણના પૂતળાના માળખાનું નિર્માણ કરવામાં આવ્યું છે, જેને ઊભું કરવા માટે ભારે જહેમત ઉઠાવવામાં આવી હતી.

આ આયોજનમાં વાંસ, સેન્ટિંગના તાર, લાકડાં, ઘાસચારો અને કાપડ સહિતની સામગ્રીનો ઉપયોગ કરવામાં આવ્યો છે. સમગ્ર માળખાનું અંદાજિત વજન 7 ટન જેટલું હોવાનું જણાવાયું છે.

તેને ઊભું કરવા માટે ત્રણ જેસીબી અને એક ક્રેનની મદદ લેવામાં આવી હતી. ભારે સાધનો અને ટેક્નોલોજીની મદદથી આ કામગીરી હાથ ધરવામાં આવી હતી.

છેલ્લા 19 વર્ષથી ચાલી આવતી આ પરંપરાને લઈને સ્થાનિક શ્રદ્ધાળુઓમાં ઉત્સાહ જોવા મળી રહ્યો છે. આ પ્રસંગે મહાપ્રસાદીનું પણ આયોજન કરવામાં આવ્યું છે, જેમાં અંદાજે 20,000 લોકો ઉપસ્થિત રહેવાની શક્યતા છે.

જય બજરંગ મંડળ ખાનપુર દ્વારા કરવામાં આવતું આ આયોજન ધાર્મિક આસ્થા, સામૂહિક સહયોગ અને પરંપરાના જતનનું પ્રતીક બન્યું છે. કાર્યક્રમને સફળ બનાવવા મંડળના સભ્યો દ્વારા તૈયારીઓ હાથ ધરવામાં આવી છે.