Pahalgam Attack Anniversary: મંગળવારે પહેલગામ હુમલાની વર્ષગાંઠ પર યુનાઇટેડ સ્ટેટ્સ અને યુરોપિયન યુનિયને ફરી એકવાર આતંકવાદ સામે ભારત સાથે ઊભા હોવાની વાત કરી છે. પહેલગામ આતંકવાદી હુમલામાં છવ્વીસ લોકો માર્યા ગયા હતા. પીડિતોને શ્રદ્ધાંજલિ આપતા ભારતમાં યુએસ એમ્બેસેડર સર્જિયો ગોરે કહ્યું કે, યુનાઇટેડ સ્ટેટ્સ ભારતના લોકો સાથે ઉભું છે અને આતંકવાદ સામેની લડાઈમાં સંપૂર્ણ સમર્થન આપશે. તેમણે આ હુમલાને ખૂબ જ પીડાદાયક ગણાવ્યો હતો અને પીડિતોના પરિવારો પ્રત્યે સંવેદના વ્યક્ત કરી હતી.

આ હુમલામાં આતંકવાદીઓએ પ્રવાસીઓને નિશાન બનાવ્યા હતા. તેમની ઓળખ પૂછ્યા પછી તેમની હત્યા કરી હતી. જેના કારણે દેશભરમાં આક્રોશ ફેલાયો હતો. આ ઘટનાની માત્ર ભારતમાં જ નહીં, પરંતુ આંતરરાષ્ટ્રીય સ્તરે પણ આકરી નિંદા થઈ હતી. યુરોપિયન યુનિયને પણ આ પ્રસંગે ભારતને પોતાનો ટેકો પુનરાવર્તિત કર્યો હતો. EU અને તેના સભ્ય દેશોએ જણાવ્યું હતું કે, તેઓ તમામ પ્રકારના આતંકવાદની સખત નિંદા કરે છે અને પીડિતોની યાદમાં ભારત સાથે ઉભા છે.

આ હુમલા બાદ ભારતે બદલો લેવા માટે ઓપરેશન સિંદૂર શરૂ કર્યું હતું. આ ઓપરેશનના ભાગરૂપે ભારતીય સેનાએ પાકિસ્તાન અને PoJKમાં આતંકવાદી ઠેકાણાઓને નિશાન બનાવ્યા હતા. જેમાં ઘણા મોટા લોન્ચપેડનો નાશ કરવામાં આવ્યો હતો. આ ઓપરેશન બાદ ભારત અને પાકિસ્તાન વચ્ચે ઘણા દિવસો સુધી તણાવ અને સંઘર્ષ ચાલુ રહ્યો હતો. આખરે 10 મે, 2025ના રોજ બંને દેશો વચ્ચે યુદ્ધવિરામ પર સંમતિ સધાઈ હતી. એકંદરે પહેલગામ હુમલાની પ્રથમ વર્ષગાંઠ પર વિશ્વભરના મુખ્ય રાષ્ટ્રો ભારતની સાથે ઉભા રહ્યા હતા, જે આતંકવાદ સામેની લડાઈમાં ભારતને આંતરરાષ્ટ્રીય સમર્થનનો સંકેત આપે છે.