Para Asian Games 2026: નક્સલીઓ સામે લડતા IED વિસ્ફોટમાં ગુમાવ્યો પગ, હવે તીરંદાજીમાં ભારતને અપાવ્યો ગોલ્ડ મેડલ
Para Asian Games 2026
Para Asian Games 2026: નક્સલીઓ સામે લડતા IED વિસ્ફોટમાં ગુમાવ્યો પગ, હવે તીરંદાજીમાં ભારતને અપાવ્યો ગોલ્ડ મેડલ
Para Asian Games 2026
Para Asian Games 2026: દેશની સુરક્ષા માટે નક્સલીઓ સામે લડતા એક કમાન્ડોએ IED વિસ્ફોટમાં પોતાનો પગ ગુમાવ્યો હતો. જોકે, આ મુશ્કેલીએ તેમનો જુસ્સો તોડી શકી નહીં. એક સમયે રાઇફલ ચલાવતા આ જવાને હાથમાં ધનુષ્ય અને બાણ પકડીને રમતગમતની દુનિયામાં નવી ઓળખ બનાવી છે. છત્તીસગઢના તોમન કુમારે પેરા એશિયન ગેમ્સ 2026માં શીતલ દેવી સાથે મળીને તીરંદાજીની મિક્સ્ડ ઇવેન્ટમાં ગોલ્ડ મેડલ જીતીને ભારતનું ગૌરવ વધાર્યું છે.
શીતલ દેવી અને તોમન કુમારની જોડીએ જીત્યું સોનું
જાપાનના આઇચી-નાગોયામાં ચાલી રહેલી પેરા એશિયન ગેમ્સમાં ગુરુવાર, 22 ઑક્ટોબરે ભારતીય જોડી તોમન કુમાર અને શીતલ દેવીએ શાનદાર પ્રદર્શન કર્યું હતું. બંનેએ મિક્સ્ડ ઇવેન્ટની ફાઇનલમાં ઇન્ડોનેશિયાની ટીમને 151-148ના સ્કોરથી હરાવીને ગોલ્ડ મેડલ પોતાના નામે કર્યો હતો. ભારતીય જોડીએ શરૂઆતથી જ લીડ જાળવી રાખી હતી અને અંતે ત્રણ પોઇન્ટના અંતરથી જીત મેળવી હતી.
આ મેડલ સાથે પેરા એશિયન ગેમ્સ 2026માં ભારતે પોતાનો 16મો ગોલ્ડ મેડલ જીત્યો હોવાનો અહેવાલ છે. આ ઉપરાંત પેરા તીરંદાજીમાં પણ ભારતને આ વર્ષે પ્રથમ ગોલ્ડ મેડલ મળ્યો છે.
ક્વોલિફિકેશન રાઉન્ડમાં બનાવ્યો વિશ્વ રેકોર્ડ
તોમન કુમાર અને શીતલ દેવીની જોડીએ ફાઇનલ પહેલાં ક્વોલિફિકેશન રાઉન્ડમાં પણ ઉત્કૃષ્ટ પ્રદર્શન કર્યું હતું. બંનેએ કુલ 1,402 પોઇન્ટ મેળવીને નવો વિશ્વ રેકોર્ડ નોંધાવ્યો હતો. આ સ્કોર અગાઉના રેકોર્ડ કરતાં બે પોઇન્ટ વધારે હતો. આ પ્રદર્શનથી ભારતીય જોડીએ પોતાની ક્ષમતા સાબિત કરી હતી અને ફાઇનલમાં પણ શાનદાર રમત દર્શાવીને ગોલ્ડ મેડલ જીત્યો હતો.
CRPFની CoBRA બટાલિયનમાં જોડાયા હતા તોમન
તોમન કુમાર મૂળ છત્તીસગઢના રહેવાસી છે. વર્ષ 2017માં તેઓ કેન્દ્રીય રિઝર્વ પોલીસ દળ (CRPF)ની નક્સલવિરોધી CoBRA કમાન્ડો બટાલિયનમાં જોડાયા હતા. દેશની સુરક્ષા માટે નક્સલીઓ સામેના અભિયાનોમાં તેમણે ભાગ લીધો હતો. જોકે, વર્ષ 2021માં એક ઓપરેશન દરમિયાન તેઓ IED વિસ્ફોટની ઝપેટમાં આવી ગયા હતા. આ દુર્ઘટનામાં તેમનો એક પગ ગંભીર રીતે ઇજાગ્રસ્ત થયો હતો અને અંતે તેમને પગ ગુમાવવો પડ્યો હતો.
આ ઘટના તેમના જીવનમાં મોટો પડકાર બની હતી. અકસ્માત બાદ તેઓ થોડો સમય ડિપ્રેશનમાં પણ રહ્યા હતા. જોકે, ત્યારબાદ તેમણે જીવનમાં ફરી આગળ વધવાનો નિર્ણય લીધો હતો.
રાઇફલ છોડીને ધનુષ્ય-બાણને બનાવ્યું પોતાનું હથિયાર
કૃત્રિમ પગ લગાવવા માટે હૈદરાબાદ ગયા ત્યારે તોમને પોતાના જેવા અન્ય દિવ્યાંગ લોકોને જોયા હતા. આ અનુભવથી તેમને ફરી નવી શરૂઆત કરવાની પ્રેરણા મળી હતી. ત્યારબાદ તેમણે તીરંદાજીને પોતાની કારકિર્દી તરીકે અપનાવી હતી. રાઇફલ ચલાવવામાં કુશળ રહેલા તોમને ધનુષ્ય અને બાણ સાથે નવી સફર શરૂ કરી હતી.
મહેનત અને સતત અભ્યાસના બળે તેમણે પેરા તીરંદાજીમાં પોતાની ઓળખ બનાવી. તેઓ વિશ્વસ્તરે પણ સફળતા મેળવી ચૂક્યા છે અને હવે પેરા એશિયન ગેમ્સમાં ગોલ્ડ મેડલ જીતીને પોતાની સફરમાં વધુ એક સિદ્ધિ ઉમેરી છે.
શીતલ દેવીની સાથે ભારતને અપાવ્યું ગૌરવ
જમ્મુ-કાશ્મીરની શીતલ દેવીનો જન્મ હાથ વિના થયો હતો. તેઓ પોતાના પગ અને શરીરના અન્ય ભાગોની મદદથી કમ્પાઉન્ડ ધનુષ્ય ચલાવે છે. ખભા અને જડબાની મદદથી ધનુષ્યની દોરી ખેંચીને નિશાન સાધે છે. તેમની મહેનત અને તોમન કુમારના અડગ જુસ્સાએ ભારતીય જોડીને આંતરરાષ્ટ્રીય મંચ પર સફળતા અપાવી છે.
તોમન કુમારની સફર દર્શાવે છે કે જીવનમાં મોટો આઘાત આવ્યા બાદ પણ હિંમત અને સતત પ્રયત્નોથી નવી દિશા મેળવી શકાય છે. દેશની સુરક્ષા માટે મેદાનમાં ઉતરેલા આ કમાન્ડોએ હવે રમતગમતના મેદાનમાં તિરંગો લહેરાવીને ભારતને ગૌરવ અપાવ્યું છે.
