Asian Para Games 2026: દીપ્તિ જીવનજીએ જીત્યો ગોલ્ડ મેડલ, 400 મીટર દોડમાં બનાવ્યો રેકોર્ડ

Asian Para Games 2026: ભારતીય ખેલાડીઓએ એશિયન પેરા ગેમ્સ 2026માં પોતાનું પ્રભાવશાળી પ્રદર્શન ચાલુ રાખ્યું છે . 20 ઓક્ટોબરના રોજ દીપ્તિ જીવનજીએ એથ્લેટિક્સમાં એવી નોંધપાત્ર સિદ્ધિ હાંસલ કરી કે તેણે માત્ર ગોલ્ડ મેડલ જ નહીં પરંતુ એક નવો ગેમ્સ રેકોર્ડ પણ બનાવ્યો.

દીપ્તિ જીવનજીએ વિમેન્સની 400 મીટર T20 ઈવેન્ટમાં 56.36 સેકન્ડના સમય સાથે પ્રથમ સ્થાન મેળવ્યું. આ સ્પર્ધામાં ભારતનો પાંચમો ગોલ્ડ મેડલ છે અને બીજા દિવસે દેશનો પહેલો ગોલ્ડ મેડલ છે.

પેરિસ પેરાલિમ્પિક્સ 2024 બ્રોન્ઝ મેડલ વિજેતા દીપ્તિએ દોડની શરૂઆતથી જ જોરદાર પ્રદર્શન કર્યું. તેણે તેના નજીકના હરીફ, જાપાનની નીના કાનોને 2 સેકન્ડથી વધુ પાછળ છોડી દીધી. કાનોએ 58.92 સેકન્ડના સમય સાથે સિલ્વર મેડલ જીત્યો, જ્યારે જાપાનની અકાને કાટોએ 1 મિનિટ 0.26 સેકન્ડના સમય સાથે બ્રોન્ઝ મેળવ્યો. દીપ્તિની સિદ્ધિએ ભારતીય ટીમને નવી ઉર્જા આપી છે. તેના પ્રદર્શનથી એ પણ સાબિત થાય છે કે ભારતીય પેરા-એથ્લીટ્સ ઈન્ટરનેશનલ મંચ પર પોતાની છાપ છોડી રહ્યા છે.

ભાવીના પટેલે બ્રોન્ઝ મેડલ જીત્યો

ભારતની અનુભવી પેરા-ટેબલ ટેનિસ ખેલાડી ભાવીના પટેલે વિમેન્સ સિંગલ્સ ક્લાસ 4-5 ઈવેન્ટમાં બ્રોન્ઝ મેડલ જીત્યો. સેમીફાઈનલમાં તે ચીનની ઝાંગ બિયાન સામે 0-3થી હારી ગઈ. ઝાંગે આ મેચ 11-7, 11-5, 11-7થી જીતી. ટોક્યો પેરાલિમ્પિક્સ 2020માં સિલ્વર મેડલ જીતનાર ભાવીના આ હાર સાથે સિંગલ્સ સ્પર્ધામાંથી બહાર થઈ ગઈ. પરંતુ સેમીફાઈનલમાં પહોંચીને તેણે ભારતના મેડલ ટેલીમાં બ્રોન્ઝ મેડલ ઉમેર્યો.

પેરા બેડમિન્ટનમાં પણ મેડલની આશા નિશ્ચિત

પેરા બેડમિન્ટનમાં, પ્રમોદ ભગત અને મનીષા રામદાસની ભારતીય મિક્સ જોડીએ સેમીફાઈનલમાં પહોંચીને મેડલ મેળવ્યો છે. SL3-SU5 કેટેગરીના ક્વાર્ટર ફાઈનલમાં, ભારતીય જોડીએ થાઈલેન્ડની ચાનિદા શ્રીનાવાકુલ અને સિરીપોંગ ટીમાર્રોમને સીધી રમતોમાં 21-15, 21-14 થી હરાવી હતી. આ મેચ ફક્ત 25 મિનિટ ચાલી હતી. સેમીફાઈનલમાં પહોંચીને ભારતીય જોડીને ઓછામાં ઓછો બ્રોન્ઝ મેડલ મળવાની ખાતરી થઈ ગઈ છે. હવે તેઓ સ્પર્ધામાં આગળ વધીને મેડલનો રંગ બદલવા પર નજર રાખશે.

ભારતીય તીરંદાજી ખેલાડીઓએ શાનદાર પ્રદર્શન કર્યું

એશિયન પેરા ગેમ્સમાં ભારતીય ખેલાડીઓએ તીરંદાજી ઈવેન્ટ્સમાં પણ સારું પ્રદર્શન કર્યું. હરવિંદર સિંહ અને ભાવના રિકર્વ કેટેગરીમાં ક્વાર્ટર ફાઈનલમાં પહોંચ્યા. શીતલ દેવી, પાયલ નાગ, ટોમન કુમાર અને શ્યામ સુંદર સ્વામી પણ કમ્પાઉન્ડ કેટેગરીમાં અંતિમ આઠમાં પહોંચ્યા.

આ પણ વાંચો: Shafali Verma સામે ICCની કાર્યવાહી, ઝિમ્બાબ્વે સામેની મેચમાં કેચ છોડ્યા બાદ કર્યો ગુસ્સો