Asian Para Gamesમાં ભારતનો વાગ્યો ડંકો, એક જ દિવસમાં 5 ગોલ્ડ સહિત 22 મેડલ, ટોપ 5માં એન્ટ્રી

Asian Para Games: એશિયન પેરા ગેમ્સ 2026માં ભારતીય ખેલાડીઓએ શાનદાર પ્રદર્શન કરીને દેશનું ગૌરવ વધાર્યું છે. બુધવારે ભારતે 5 ગોલ્ડ સહિત કુલ 22 મેડલ જીત્યા હતા. આ સાથે ભારતના કુલ મેડલની સંખ્યા 62 પર પહોંચી છે અને દેશ મેડલ ટેલીમાં પાંચમા સ્થાને પહોંચ્યો છે.

ભારતે અત્યાર સુધી 14 ગોલ્ડ, 22 સિલ્વર અને 26 બ્રોન્ઝ મેડલ જીત્યા છે. ખાસ વાત એ છે કે ભારતના 14માંથી 13 ગોલ્ડ મેડલ પેરા એથ્લેટિક્સના ખેલાડીઓએ જીત્યા છે.

સિમરન, પ્રવીણ અને આયુષે રચ્યો ઈતિહાસ

ભારતીય દોડવીર સિમરનએ મહિલાઓની 100 મીટર T12 સ્પર્ધામાં 12.02 સેકન્ડના ગેમ્સ રેકોર્ડ સાથે ગોલ્ડ મેડલ જીત્યો હતો. આ સ્પર્ધામાં તેમનો આ બીજો ગોલ્ડ મેડલ છે. અગાઉ તેમને 200 મીટર સ્પર્ધામાં પણ ગોલ્ડ મેડલ જીત્યો હતો.

પ્રવીણ કુમારે પુરુષોની હાઈ જમ્પ T44/64 સ્પર્ધામાં 2.05 મીટરની છલાંગ લગાવીને ગેમ્સ રેકોર્ડ સાથે ગોલ્ડ જીત્યો હતો. આ જ સ્પર્ધામાં બંટીએ 1.92 મીટરની છલાંગ સાથે સિલ્વર મેડલ મેળવ્યો હતો. આયુષ વર્માએ પુરુષોની શોટપુટ F53 સ્પર્ધામાં 8.16 મીટરનો થ્રો કરીને ગોલ્ડ મેડલ જીત્યો હતો. આ સ્પર્ધામાં તેનો આ બીજો મેડલ છે.

શોટપુટમાં ભારતની ક્લીન સ્વીપ

પુરુષોની શોટપુટ F46 સ્પર્ધામાં ભારતે ત્રણેય મેડલ જીતીને ક્લીન સ્વીપ કર્યો હતો. સચિન ખિલારીએ ગેમ્સ રેકોર્ડ સાથે ગોલ્ડ મેડલ જીત્યો હતો. મોહમ્મદ યાસરે 15.06 મીટરના થ્રો સાથે સિલ્વર, જ્યારે પરવીને 14.94 મીટરના થ્રો સાથે બ્રોન્ઝ મેડલ મેળવ્યો હતો.

દિલીપ ગાવિતે પુરુષોની 100 મીટર T47 સ્પર્ધામાં 10.69 સેકન્ડના સમય સાથે ગોલ્ડ જીત્યો હતો. આ જ સ્પર્ધામાં ભારતના મોહમ્મદ મોર્સિંગનાકથે 10.72 સેકન્ડના સમય સાથે સિલ્વર મેડલ મેળવ્યો હતો.

તીરંદાજી, સ્વિમિંગ અને પાવરલિફ્ટિંગમાં પણ મેડલ

શીતલ દેવી અને પાયલ નાગે મહિલા ડબલ્સ તીરંદાજીમાં સિલ્વર મેડલ જીત્યો હતો. સ્વિમિંગમાં રવિ કાર્તિક બુદિગિનાએ પુરુષોની 100 મીટર બેકસ્ટ્રોક S13 સ્પર્ધામાં સિલ્વર મેળવ્યો હતો. હિમાંશુ નંદલે 100 મીટર બ્રેસ્ટસ્ટ્રોક S11માં બ્રોન્ઝ મેડલ જીત્યો હતો.

પેરા બેડમિન્ટનમાં કૃષ્ણા નાગર અને સિવરાજન સોલાઈમલાઈએ પુરુષ ડબલ્સ SH6માં સિલ્વર મેડલ મેળવ્યો હતો. જ્યારે પાવરલિફ્ટિંગમાં કસ્તુરી રાજામણીએ મહિલાઓના 67 કિલોગ્રામ વર્ગમાં સિલ્વર જીત્યો હતો.

સ્પર્ધાના હજુ 2 દિવસ બાકી હોવાથી ભારતના મેડલમાં વધુ વધારો થવાની આશા છે. ભારતીય ખેલાડીઓના આ પ્રદર્શનથી દેશના મેડલ ટેબલમાં પોતાની સ્થિતિ વધુ મજબૂત કરવાની તક છે.

આ પણ વાંચો: India Vs New Zealand પ્રથમ T20 મેચ ક્યારે અને કેટલા વાગ્યે શરૂ થશે? જાણો ડિટેલ્સ