Narendra Modi: PM મોદીના ઓડિશા પ્રવાસ પહેલાં પુરી બીચ પર ખાસ કલાકૃતિ, સુદર્શન પટનાયકે રેતીથી કંડાર્યું RBI ડેટા સેન્ટર

Narendra Modi: વડાપ્રધાન નરેન્દ્ર મોદીના ઓડિશા પ્રવાસ પહેલાં પુરીના દરિયાકિનારે તેમના સ્વાગત માટે ખાસ રેતીની કલાકૃતિ તૈયાર કરવામાં આવી છે. જાણીતા સૅન્ડ આર્ટિસ્ટ અને પદ્મશ્રીથી સન્માનિત સુદર્શન પટનાયકે પુરી બીચ પર 8 ફૂટ ઊંચી વિશાળ કલાકૃતિ બનાવી છે. તેમાં ઓડિશાની ઓળખ સમાન કોનાર્ક ચક્ર અને ભારતીય રિઝર્વ બેંક (RBI)ના નવા ડેટા સેન્ટરની ઝલક રજૂ કરવામાં આવી છે.

રેતીની કલાકૃતિથી PMનું સ્વાગત

સુદર્શન પટનાયકે જણાવ્યું કે વડાપ્રધાન ઓડિશામાં RBIના નવા ડેટા સેન્ટરનું ઉદ્ઘાટન કરવા આવી રહ્યા છે, જે રાજ્ય માટે ગૌરવની બાબત છે. તેમણે કલાકૃતિમાં કોનાર્ક ચક્રની સાથે ડેટા સેન્ટરને પણ સ્થાન આપ્યું છે. પટનાયકના જણાવ્યા અનુસાર, તેઓ પોતાની કલા દ્વારા વડાપ્રધાનનું સ્વાગત કરવા માગે છે.

₹169 કરોડના ડેટા સેન્ટરનું ઉદ્ઘાટન

વડાપ્રધાન નરેન્દ્ર મોદી રવિવાર, 25 ઑક્ટોબરે ઓડિશાની મુલાકાતે રહેશે. આ દરમિયાન તેઓ ભુવનેશ્વર નજીક જટણીના ઇન્ફો વેલી-2 ખાતે RBIના નવા ડેટા સેન્ટર અને સાયબર સુરક્ષા તાલીમ સંસ્થાનું ઉદ્ઘાટન કરશે. અહેવાલ મુજબ, આ આધુનિક ડેટા સેન્ટર આશરે ₹169 કરોડના ખર્ચે તૈયાર કરવામાં આવ્યું છે.

આ કાર્યક્રમને લઈને રાજ્ય વહીવટીતંત્ર દ્વારા તૈયારીઓ પૂર્ણ કરવામાં આવી છે. ઉદ્ઘાટન બાદ વડાપ્રધાન જાહેર સભાને સંબોધિત કરશે. ત્યારબાદ સાંજે તેઓ દિલ્હી જવા રવાના થશે.

ઓડિશા પહેલાં વારાણસીની મુલાકાત

ઓડિશા પહોંચતા પહેલાં વડાપ્રધાન ઉત્તર પ્રદેશના વારાણસીની મુલાકાત પણ લેશે. ત્યાં તેઓ અરવિંદ લિમિટેડની નવી ગારમેન્ટ મેન્યુફેક્ચરિંગ ફેક્ટરીનું ઉદ્ઘાટન કરશે. ત્યારબાદ નમો ઘાટ પર ભારતીય વાયુસેનાના ‘વિંગ્સ ઓવર ગંગા’ એર શોમાં ભાગ લેશે.

આ પ્રવાસ દરમિયાન ટેક્નોલોજી, સાયબર સુરક્ષા, ઔદ્યોગિક વિકાસ અને ભારતીય સંસ્કૃતિ સાથે જોડાયેલા કાર્યક્રમો યોજાવાના છે.

આ પણ વાંચો : Wings Over Ganga: કાશીના નમો ઘાટ પર ભવ્ય એર શો, CM યોગીએ PM મોદીના આગમનનું કર્યું સ્વાગત