Navi Mumbai ઈન્ટરનેશનલ એરપોર્ટ પર મુસાફરો માટે અનેક પરિવહન સુવિધાઓ, બસ-ટેક્સીથી લઈ શટલ સેવા ઉપલબ્ધ

Navi Mumbai: નવી મુંબઈ ઈન્ટરનેશનલ એરપોર્ટ પરથી મુસાફરી કરતા પ્રવાસીઓ માટે હવે અવરજવર વધુ સરળ અને પોષાય તેવી બનશે. અદાણી એરપોર્ટ હોલ્ડિંગ્સ લિમિટેડ દ્વારા સંચાલિત નવી મુંબઈ ઈન્ટરનેશનલ એરપોર્ટ 25 ઓક્ટોબર 2026થી શરૂ થનારા શિયાળુ સમયપત્રક પહેલાં પોતાના ગ્રાઉન્ડ મોબિલિટી નેટવર્કનો વિસ્તાર કરી રહ્યું છે.

10 ઓક્ટોબરથી 'ભારત ટેક્સી' 40 વાહનોના સમર્પિત કાફલા સાથે સેવા શરૂ કરશે

7 ઓક્ટોબરથી મહારાષ્ટ્ર સ્ટેટ રોડ ટ્રાન્સપોર્ટ કોર્પોરેશન એટલે કે MSRTC દ્વારા ‘ઈ-શિવઈ’ ઈલેક્ટ્રિક બસ સેવા શરૂ કરવામાં આવશે. નવી મુંબઈ એરપોર્ટથી પુણેનું ભાડું 450 રૂપિયા, બોરીવલીનું 210 રૂપિયા અને દાદર ઈસ્ટનું 170 રૂપિયા રહેશે. 12 વર્ષથી ઓછી ઉંમરના બાળકો તેમજ નેશનલ કોમન મોબિલિટી કાર્ડ સાથે મુસાફરી કરતી મહિલાઓને અડધા ભાડાની સુવિધા મળશે.

10 ઓક્ટોબરથી ‘ભારત ટેક્સી’ 40 વાહનોના સમર્પિત કાફલા સાથે સેવા શરૂ કરશે. સાથે જ પ્રીપેડ ટેક્સી અને ઓટો-રિક્ષાની સુવિધા પણ ઉપલબ્ધ કરાવવામાં આવશે. ‘ચલો બસ’ દ્વારા દરરોજ 21 બસ સેવા ચલાવવામાં આવશે, જે એરપોર્ટને મરોલ, બાંદ્રા, દાદર અને કોલાબા સાથે જોડશે.

બીજી તરફ NMMT દ્વારા A1થી A7 સુધીના સાત સમર્પિત એરપોર્ટ રૂટ કાર્યરત રહેશે. મુસાફરો માટે Uber Go, Uber Premier અને Uber Auto જેવી એપ આધારિત સેવાઓ પણ ઉપલબ્ધ રહેશે. આ ઉપરાંત ભાડે કારની સુવિધા પણ મળશે.

ટ્રાન્સપોર્ટ ક્ષમતા વધારીને 4,594 વાહનો કરવામાં આવી

નવી મુંબઈ એરપોર્ટ અને છત્રપતિ શિવાજી મહારાજ ઈન્ટરનેશનલ એરપોર્ટ વચ્ચે દર કલાકે મફત ‘ઈન્ટર-એરપોર્ટ શટલ’ સેવા પણ શરૂ કરવામાં આવશે. આ સેવા સિટી ફ્લો, આર્યા અને ચલો બસ દ્વારા સંચાલિત થશે.

એરપોર્ટની કુલ ગ્રાઉન્ડ ટ્રાન્સપોર્ટ ક્ષમતા વધારીને 4,594 વાહનો કરવામાં આવી રહી છે. તેમાં 3,787 એપ આધારિત ટેક્સી, 184 રેન્ટલ કાર, 171 ઓટો અને 547 બસનો સમાવેશ થાય છે. એરપોર્ટને પનવેલ, તારઘર અને બામણડોંગરી રેલવે સ્ટેશન ઉપરાંત અટલ સેતુ અને વિવિધ મુખ્ય માર્ગો સાથે પણ જોડવામાં આવ્યું છે.

આ પણ વાંચો: Viksit Bharat 2047: ભારત હવે માત્ર 'સ્ટેન્ડર્ડ ટેકર' નહીં પણ 'સ્ટેન્ડર્ડ મેકર': જ્યોતિરાદિત્ય સિંધિયા