Kerala Temple Tradition: ભગવાનની શોભાયાત્રા માટે 5 કલાક બંધ રહેશે આંતરરાષ્ટ્રીય એરપોર્ટ, રનવે પરથી પસાર થશે યાત્રા
Kerala Temple Tradition
Kerala Temple Tradition: ભગવાનની શોભાયાત્રા માટે 5 કલાક બંધ રહેશે આંતરરાષ્ટ્રીય એરપોર્ટ, રનવે પરથી પસાર થશે યાત્રા
Kerala Temple Tradition
Kerala Temple Tradition: ભારતમાં ધાર્મિક પરંપરા અને આધુનિક વ્યવસ્થાનો અનોખો સમન્વય જોવા મળે છે. કેરળના તિરુવનંતપુરમ આંતરરાષ્ટ્રીય એરપોર્ટે 20 ઑક્ટોબર, મંગળવાર માટે વિશેષ એડવાઇઝરી જાહેર કરી છે. શ્રી પદ્મનાભસ્વામી મંદિરની પ્રાચીન ‘અલ્પાસી અરાટ્ટુ’ શોભાયાત્રા એરપોર્ટના રનવે પરથી પસાર થવાની હોવાથી સાંજે 4 વાગ્યાથી રાત્રે 9 વાગ્યા સુધી ઉડાન સેવાઓ બંધ રાખવામાં આવશે. આ દરમિયાન મુસાફરોને પોતાની ફ્લાઇટના સમયમાં થયેલા ફેરફાર અંગે એરલાઇન પાસેથી માહિતી મેળવીને મુસાફરીનું આયોજન કરવાની સલાહ આપવામાં આવી છે.
શોભાયાત્રા માટે એરપોર્ટ પાંચ કલાક બંધ રહેશે
તિરુવનંતપુરમ આંતરરાષ્ટ્રીય એરપોર્ટ દ્વારા સોશિયલ મીડિયા પર માહિતી આપીને મુસાફરોને સાવચેત કરવામાં આવ્યા છે. 20 ઑક્ટોબરના રોજ સાંજે 4થી રાત્રે 9 વાગ્યા સુધી ફ્લાઇટ સેવાઓ સ્થગિત રહેશે. આ નિર્ણય શ્રી પદ્મનાભસ્વામી મંદિરની અલ્પાસી અરાટ્ટુ શોભાયાત્રા રનવે પરથી કોઈ અવરોધ વિના પસાર થઈ શકે તે માટે લેવામાં આવ્યો છે.
આ સમયગાળા દરમિયાન ફ્લાઇટના સમયપત્રકમાં ફેરફાર થઈ શકે છે. તેથી મુસાફરોને એરલાઇનનો સંપર્ક કરીને પોતાની ફ્લાઇટની નવી સ્થિતિ તપાસવાની સલાહ આપવામાં આવી છે.
એરપોર્ટ બન્યું તે પહેલાંથી ચાલી આવે છે પરંપરા
અલ્પાસી અરાટ્ટુ શ્રી પદ્મનાભસ્વામી મંદિરનો સદીઓ જૂનો ધાર્મિક અને સાંસ્કૃતિક ઉત્સવ છે. આ પરંપરા 1932માં એરપોર્ટ બન્યું તે પહેલાંથી ચાલી આવતી હોવાનું માનવામાં આવે છે. મંદિરની શોભાયાત્રાનો પરંપરાગત માર્ગ હાલના એરપોર્ટના રનવે પરથી પસાર થાય છે. આથી ધાર્મિક પરંપરાનું સન્માન જાળવવા દર વર્ષે નિર્ધારિત સમય માટે હવાઈ સેવાઓ બંધ રાખવામાં આવે છે.
10 દિવસના અલ્પાસી મહોત્સવનું થશે સમાપન
અલ્પાસી મહોત્સવની શરૂઆત 11 ઑક્ટોબરે થઈ હતી. 19 ઑક્ટોબરે ‘પલ્લિવેટ્ટા’ નામની શાહી શિકારની ધાર્મિક વિધિ યોજાશે, જ્યારે 20 ઑક્ટોબરે અલ્પાસી અરાટ્ટુ સાથે મહોત્સવનું સમાપન થશે.
‘અરાટ્ટુ’નો અર્થ પવિત્ર સ્નાન થાય છે. આ પ્રસંગે ભગવાન પદ્મનાભસ્વામી, ભગવાન નરસિંહ અને ભગવાન શ્રીકૃષ્ણની મૂર્તિઓને શણગારેલા ગરુડ વાહનો પર બિરાજમાન કરીને મંદિરથી આશરે પાંચ કિલોમીટર દૂર શંખુમુખમ સમુદ્રતટે લઈ જવામાં આવે છે.
અરબી સમુદ્રમાં કરાવવામાં આવે છે પવિત્ર સ્નાન
સમુદ્રતટે મુખ્ય પૂજારીના નેતૃત્વમાં મંત્રોચ્ચાર સાથે દેવમૂર્તિઓને અરબી સમુદ્રના પાણીમાં ત્રણ વખત પવિત્ર સ્નાન કરાવવામાં આવે છે. આ ધાર્મિક વિધિ આધ્યાત્મિક શુદ્ધિ અને અનિષ્ટ પર સારા તત્ત્વોના વિજયનું પ્રતીક માનવામાં આવે છે.
આમ, એક તરફ એરપોર્ટ પર આધુનિક હવાઈ સેવાઓનું સંચાલન થાય છે, તો બીજી તરફ સદીઓ જૂની ધાર્મિક પરંપરાને જાળવવા દર વર્ષે ઉડાન સેવાઓ થોડા કલાકો માટે રોકવામાં આવે છે. તિરુવનંતપુરમની આ પરંપરા ધાર્મિક આસ્થા અને ઐતિહાસિક વારસાની અનોખી ઓળખ બની રહી છે.
