FlyDubai Captain : 19 વર્ષની ઉંમરે બદલાયું સપનું, આજે 174 મુસાફરોના રક્ષક બન્યા કેપ્ટન સ્મિત

FlyDubai Captain : મુંબઈના રહેવાસી સ્મિત મછાર શરૂઆતથી પાઇલટ બનવા માંગતા નહોતા. તેઓ પરિવારના ટેક્સટાઇલ બિઝનેસ સાથે જોડાવાની યોજના બનાવી રહ્યા હતા. પરંતુ 19 વર્ષની ઉંમરે એક એવિએશન સેમિનારે તેમની કારકિર્દીની દિશા બદલી નાખી.

સ્કૂલ બાદ સ્મિતે ટેક્સટાઇલ એન્જિનિયરિંગનો અભ્યાસ શરૂ કર્યો હતો. ત્યારબાદ તેમણે મુંબઈની વેલિંગકર ઇન્સ્ટિટ્યૂટ ઓફ મેનેજમેન્ટમાં મેનેજમેન્ટનો અભ્યાસ કર્યો. આ દરમિયાન એવિએશન પ્રત્યે તેમનો રસ વધ્યો અને તેમણે પાઇલટ બનવાનું નક્કી કર્યું. ત્યારબાદ તેમણે ન્યૂઝીલેન્ડમાં ફ્લાઈંગ ટ્રેનિંગ લીધી.

મછાર પહેલા સ્પાઇસજેટ સાથે જોડાયા હતા

ટ્રેનિંગ પૂર્ણ કર્યા બાદ જૂન 2011માં સ્મિત મછાર સ્પાઇસજેટ સાથે જોડાયા હતા. તેમણે ત્યાં 11 વર્ષથી વધુ સમય સુધી સેવા આપી અને સિનિયર કમાન્ડર તથા લાઇન ટ્રેનિંગ કેપ્ટન તરીકે પણ કામગીરી કરી હતી. લાઇન ટ્રેનિંગ કેપ્ટન તરીકે તેઓ અન્ય પાઇલટ્સને તાલીમ અને ચેકિંગમાં પણ જોડાયેલા હતા. તેમની પ્રોફાઇલ મુજબ તેમણે લગભગ 9750 ફ્લાઈંગ કલાકનો અનુભવ મેળવ્યો છે.

જૂન 2022માં સ્મિત મછાર ફ્લાયદુબઈમાં ડાયરેક્ટ-એન્ટ્રી કેપ્ટન તરીકે જોડાયા અને બોઇંગ 737 ફ્લીટ પર કામગીરી શરૂ કરી. 30 સપ્ટેમ્બર 2026ના રોજ તેમની કારકિર્દીની સૌથી ગંભીર કસોટી સામે આવી. દુબઈથી તેલ અવીવ જઈ રહેલી ફ્લાઇટ FZ1073માં કોકપિટમાં ગંભીર ઘટના સર્જાઈ હતી.

સહ-પાઇલટે કેપ્ટન સ્મિત પર હુમલો કર્યો હતો

ગંભીર રીતે ઇજાગ્રસ્ત હોવા છતાં સ્મિતે કોકપિટનો દરવાજો ખોલવામાં સફળતા મેળવી, જેના કારણે ક્રૂ અને મુસાફરોને અંદર પહોંચવાની તક મળી. ત્યારબાદ વિમાનમાં હાજર બે ઑફ-ડ્યૂટી ફ્લાયદુબઈ પાઇલટ્સે વિમાનને સંભાળવામાં મદદ કરી અને ફ્લાઇટને સાઉદી અરેબિયાના તબૂક ખાતે સુરક્ષિત રીતે લેન્ડ કરવામાં આવી. વિમાનમાં સવાર 174 લોકો સુરક્ષિત રહ્યા હતા. ઘટના બાદ કેપ્ટન સ્મિતને તબૂકમાં સારવાર આપવામાં આવી હતી અને ભારતીય અધિકારીઓના જણાવ્યા મુજબ તેમની હાલત સ્થિર છે.

વડાપ્રધાન નરેન્દ્ર મોદીએ પણ કેપ્ટન સ્મિતની હિંમતની પ્રશંસા કરી છે. તેમની કારકિર્દીની સફર દર્શાવે છે કે ટેક્સટાઇલ એન્જિનિયરિંગ અને મેનેજમેન્ટના અભ્યાસથી શરૂ થયેલી યાત્રા અંતે એક અનુભવી કોમર્શિયલ પાઇલટ તરીકેની કારકિર્દીમાં પરિવર્તિત થઈ. આજે ફ્લાઇટ FZ1073ની ઘટનામાં તેમની કામગીરીને કારણે સ્મિત મછાર આંતરરાષ્ટ્રીય સ્તરે ચર્ચામાં છે.

આ પણ વાંચો : Jamnagar માં ખનીજ વિભાગનો સપાટો, બ્લેકટ્રેપ ભરેલા 3 ડમ્પર ઝડપાયા