US H1B Visa: ભારતીયોને ‘બંધુઆ મજૂર’ કહેવા બદલ અમેરિકાને ભારતનો સણસણતો જવાબ

India US H1B Visa Row: અમેરિકાના ઉપરાષ્ટ્રપતિ જેડી વેન્સ દ્વારા એચ-1બી વિઝા ધારકો માટે ‘ઇન્ડેન્ચર્ડ લેબર’ એટલે કે ‘બંધુઆ મજૂર’ શબ્દનો ઉપયોગ કરવામાં આવતા ભારતે સખત વાંધો વ્યક્ત કર્યો છે. ભારતના વિદેશ મંત્રાલયે આ પ્રકારની ભાષાને અયોગ્ય અને અત્યંત અપમાનજનક ગણાવી છે. મંત્રાલયે જણાવ્યું કે આવી ટિપ્પણીઓ અમેરિકામાં ભારતીય વ્યાવસાયિકોના યોગદાનને અવગણે છે અને ઐતિહાસિક તથા સંસ્થાનવાદી ભૂતકાળની પીડાદાયક યાદો તાજી કરે છે.

ભારતીય વ્યાવસાયિકોના યોગદાનને અવગણવા સામે ભારતનો વાંધો

9 ઓક્ટોબર, 2026ના રોજ જાહેર કરાયેલા નિવેદનમાં વિદેશ મંત્રાલયે કહ્યું કે ભારતીય વ્યાવસાયિકો અમેરિકામાં ઉચ્ચ શિક્ષિત અને કુશળ કર્મચારીઓ તરીકે કામ કરી રહ્યા છે. તેઓ અમેરિકાની અર્થવ્યવસ્થા, ટેક્નોલોજી અને નવીનતાના ક્ષેત્રમાં મહત્ત્વપૂર્ણ યોગદાન આપે છે. મંત્રાલયે વધુમાં જણાવ્યું કે અમેરિકાનો ઇતિહાસ પણ વિવિધ પેઢીઓના પ્રવાસીઓના શ્રમ, સાહસિકતા અને નવીનતાથી ઘડાયો છે. આવી સ્થિતિમાં ભારતીય વ્યાવસાયિકો માટે ઐતિહાસિક રીતે પીડાદાયક અર્થ ધરાવતા શબ્દોનો ઉપયોગ કરવો અયોગ્ય અને અપમાનજનક છે.

PERM કાર્યક્રમ પરના નિર્ણય બાદ વિવાદ વકર્યો

આ વિવાદ અમેરિકાના શ્રમ વિભાગ દ્વારા પરમેનન્ટ લેબર સર્ટિફિકેશન (PERM) કાર્યક્રમ સંબંધિત કરવામાં આવેલા નિર્ણય બાદ સામે આવ્યો છે. આ કાર્યક્રમ અમેરિકામાં ગ્રીન કાર્ડ મેળવવાની પ્રક્રિયા સાથે જોડાયેલો છે. અહેવાલ મુજબ, ઇન્ફોસિસ, ટીસીએસ, વિપ્રો અને એચસીએલ જેવી ભારતીય આઇટી કંપનીઓ ઉપરાંત માઇક્રોસોફ્ટ અને એડોબ જેવી કંપનીઓ પર પણ આ નિર્ણયની અસર પડી છે. અમેરિકાના ઉપરાષ્ટ્રપતિ જેડી વેન્સે આ નિર્ણયનો બચાવ કરતાં દાવો કર્યો હતો કે કંપનીઓ અમેરિકન કર્મચારીઓને નોકરીમાંથી દૂર કરીને વિદેશી કર્મચારીઓને ઓછા વેતન પર ન રાખી શકે. તેમણે માઇક્રોસોફ્ટનું ઉદાહરણ આપીને વિદેશી કર્મચારીઓના વેતન અંગે પણ સવાલો ઉઠાવ્યા હતા.

ભારતીય આઇટી કંપનીઓ અને વ્યાવસાયિકોની ચિંતા

ERM કાર્યક્રમ અંગે ભારતે પણ ચિંતા વ્યક્ત કરી છે. વિદેશ મંત્રાલયના જણાવ્યા અનુસાર, આ પ્રકારનાં પગલાં ભારત અને અમેરિકા વચ્ચેની સહિયારી મહત્ત્વાકાંક્ષાઓને આગળ વધારવામાં મદદરૂપ થતા નથી. ભારતીય વ્યાવસાયિકોની અવરજવર અને ભારતીય આઇટી કંપનીઓના કામકાજને લગતા મુદ્દાઓના ઉકેલ માટે ભારત અમેરિકાના અધિકારીઓ સાથે સંપર્કમાં છે.

એચ-1બી વિઝા મારફતે મોટી સંખ્યામાં ભારતીય આઇટી નિષ્ણાતો અમેરિકામાં કામ કરે છે. તેઓ ત્યાંની કંપનીઓની કામગીરી, સંશોધન અને ટેક્નોલોજીકલ નવીનતામાં યોગદાન આપે છે. ભારતનું વલણ છે કે કુશળ પ્રતિભાની આંતરરાષ્ટ્રીય અવરજવરથી બંને દેશોની અર્થવ્યવસ્થાને લાભ થઈ શકે છે. આ વિવાદે ભારત-અમેરિકા સંબંધોમાં ભારતીય વ્યાવસાયિકોના યોગદાન, વિઝા નીતિ અને રોજગાર સંબંધિત મુદ્દાઓને ફરી ચર્ચાના કેન્દ્રમાં લાવ્યા છે.