Delhi CNG Price : IGLના જણાવ્યા અનુસાર, CNG માટે જરૂરી ગેસનો મોટો હિસ્સો ઇમ્પોર્ટેડ LNGમાંથી આવે છે. પશ્ચિમ એશિયામાં ચાલી રહેલા સંઘર્ષને કારણે આંતરરાષ્ટ્રીય બજારમાં LNGના ભાવમાં નોંધપાત્ર વધારો થયો છે.

આ વધેલી ઇનપુટ ગેસ કોસ્ટની આંશિક ભરપાઈ કરવા માટે CNGના ભાવમાં વધારો કરવો જરૂરી બન્યો હોવાનું કંપનીએ જણાવ્યું છે. ઇન્દ્રપ્રસ્થ ગેસ લિમિટેડ (IGL) દ્વારા CNGના ભાવમાં પ્રતિ કિલોગ્રામ ₹3.89નો વધારો કરવામાં આવ્યો છે. નવા ભાવ આજ સવારે 6 વાગ્યાથી લાગુ થઈ ગયા છે. આ ભાવવધારાની સીધી અસર દિલ્હી અને NCRના શહેરોમાં CNGથી વાહન ચલાવતા લાખો વાહનચાલકો પર પડશે.

CNG ભાવ વધારાથી મુસાફરી પણ મોંઘી થવાની શક્યતા

આ વર્ષે CNGના ભાવમાં થયેલો આ પાંચમો વધારો છે. મે મહિનામાં પણ પશ્ચિમ એશિયાના સંઘર્ષને કારણે વૈશ્વિક સ્તરે ઊર્જાના ભાવ વધ્યા હતા. તે સમયે IGLએ માત્ર 10 દિવસમાં ચાર તબક્કામાં CNGના ભાવમાં કુલ ₹6 પ્રતિ કિલોગ્રામનો વધારો કર્યો હતો.

હવે ફરી ભાવ વધતા CNG વાહનચાલકો પર વધારાનો આર્થિક બોજ આવ્યો છે. ભાવવધારા બાદ નોંધાયેલા નવા દર મુજબ નોઈડા અને ગાઝિયાબાદમાં CNGનો ભાવ ₹95.59 પ્રતિ કિલોગ્રામ, જ્યારે મેરઠમાં ₹95.47 અને ગુરુગ્રામમાં ₹92.01 પ્રતિ કિલોગ્રામ થઈ ગયો છે. અલગ-અલગ રાજ્યોમાં VATના માળખામાં તફાવત હોવાથી શહેર પ્રમાણે CNGના ભાવમાં પણ ફેરફાર જોવા મળે છે.

LNG મોંઘી થતાં CNGના ભાવ વધ્યા

CNGના ભાવમાં વધારો માત્ર ખાનગી વાહનચાલકો પૂરતો મર્યાદિત નહીં રહે તેવી શક્યતા છે. દિલ્હી-NCRમાં મોટી સંખ્યામાં ઓટો-રિક્ષા, ટેક્સી અને માલવાહક વાહનો CNG પર ચાલે છે. તેથી ઇંધણના ખર્ચમાં વધારો થતાં માલ પરિવહન અને મુસાફરીના ભાડા પર પણ તેની અસર પડી શકે છે. આંતરરાષ્ટ્રીય સ્તરે પણ LNGના ભાવમાં તેજી જોવા મળી રહી છે. એશિયા-JKM LNG બેન્ચમાર્ક આ વર્ષે ફેબ્રુઆરીમાં આશરે $11 પ્રતિ MMBTUથી વધીને ઓગસ્ટમાં $23.4 થયો છે.

બીજી તરફ યુરોપિયન TTF ગેસ બેન્ચમાર્ક પણ આશરે $11.3થી વધીને $23.3 પ્રતિ MMBTU થયો છે. યુરોપમાં શિયાળાની સિઝન પહેલાં LNGનો મોટાપાયે સ્ટોક કરવામાં આવી રહ્યો છે. સાથે જ પશ્ચિમ એશિયામાં વધેલા તણાવ અને હોર્મુઝ સ્ટ્રેટ મારફતે વેપાર પર પડતી અસરને કારણે વૈશ્વિક ગેસ સપ્લાય અને ભાવ પર દબાણ વધી રહ્યું છે. તેની અસર હવે ભારતમાં CNGના ભાવ પર પણ જોવા મળી રહી છે.

આ પણ વાંચો : Gujarat Latest News Live : ગુજરાતમાં વરસાદની સિસ્ટમ ખોરવાઈ !