Stock Market Today: ભારતીય શેરબજાર સપાટ ખુલ્યું, કાચા તેલના ભાવ 100 ડોલરને પાર જતાં ઓટો અને કન્ઝ્યુમર શેર પર દબાણ

Stock Market Today: 10 સપ્ટેમ્બર 2026ના રોજ ભારતીય શેરબજારમાં શરૂઆતના કારોબારમાં ખાસ હલચલ જોવા મળી નહોતી અને બજાર લગભગ સપાટ રહ્યું હતું. સવારે 9:23 વાગ્યે સેન્સેક્સ 36 પોઈન્ટ એટલે કે 0.05% ઘટીને 74,727.96 પર અને નિફ્ટી 8.25 પોઈન્ટ એટલે કે 0.01%ના ઘટાડા સાથે 23,430.00 પર ટ્રેડ થઈ રહ્યો હતો. વૈશ્વિક બજારોના નબળા સંકેતો અને બ્રેન્ટ ક્રૂડ ઓઈલના ભાવ 100 ડોલર પ્રતિ બેરલની ઉપર જવાથી રોકાણકારોમાં સાવચેતી જોવા મળી રહી છે.

ઓટો અને કન્ઝ્યુમર શેર પર દબાણ

શરૂઆતના કારોબારમાં નિફ્ટી ઓટો અને નિફ્ટી કન્ઝ્યુમર ડ્યુરેબલ્સ ટોપ લૂઝર્સમાં રહ્યા હતા. આ ઉપરાંત નિફ્ટી ઈન્ડિયા મેન્યુફેક્ચરિંગ, નિફ્ટી ફાર્મા, નિફ્ટી ઈન્ડિયા ડિફેન્સ, નિફ્ટી કન્ઝમ્પશન, નિફ્ટી હેલ્થકેર, નિફ્ટી રિયલ્ટી, નિફ્ટી ઈન્ફ્રા અને નિફ્ટી મેટલ પણ લાલ નિશાનમાં જોવા મળ્યા હતા.

આ સેક્ટર્સમાં ખરીદીનો માહોલ

બીજી તરફ નિફ્ટી PSU બેન્ક, નિફ્ટી ઓઈલ એન્ડ ગેસ, નિફ્ટી PSE, નિફ્ટી એનર્જી, નિફ્ટી પ્રાઈવેટ બેન્ક અને નિફ્ટી FMCG સહિતના કેટલાક સૂચકાંકો લીલા નિશાનમાં ટ્રેડ થઈ રહ્યા હતા. મિડકેપ અને સ્મોલકેપ શેરોમાં પણ મિશ્ર કારોબાર જોવા મળ્યો હતો.

વૈશ્વિક બજારોમાં પણ નબળાઈ

એશિયાના મોટાભાગના બજારોમાં ઘટાડો જોવા મળ્યો હતો. ટોક્યો, શાંઘાઈ, હોંગકોંગ, બેન્કોક, સિયોલ અને જકાર્તાના બજારો લાલ નિશાનમાં રહ્યા હતા. અગાઉ અમેરિકન બજારોમાં પણ નબળાઈ જોવા મળી હતી. ડાઉ જોન્સ 0.77%, જ્યારે નાસ્ડેક 0.64% ઘટીને બંધ થયો હતો.

ક્રૂડ ઓઈલ 101 ડોલરને પાર, ભારત માટે ચિંતા

પશ્ચિમ એશિયામાં વધતા તણાવ વચ્ચે બ્રેન્ટ ક્રૂડનો ભાવ 100 ડોલર પ્રતિ બેરલને પાર થઈ ગયો છે અને લગભગ 102 ડોલર સુધી પહોંચ્યો હતો. ભારત પોતાની ક્રૂડ ઓઈલની જરૂરિયાતનો મોટો હિસ્સો આયાત કરે છે, તેથી લાંબા સમય સુધી ક્રૂડના ભાવ ઊંચા રહે તો મોંઘવારી, રૂપિયો, કંપનીઓના નફા અને આર્થિક વૃદ્ધિ પર દબાણ વધી શકે છે.

નિફ્ટી માટે 23,500નું સ્તર મહત્વનું

માર્કેટ નિષ્ણાતોના મતે નિફ્ટી 23,500ના મહત્વના રેઝિસ્ટન્સ લેવલની નીચે રહેતા બજારની સ્થિતિ નબળી દેખાઈ રહી છે. વધતા ક્રૂડ ભાવ અને ઊંચા અમેરિકન બોન્ડ યીલ્ડને કારણે વૈશ્વિક વ્યાજદર અને મોંઘવારી અંગેની ચિંતા પણ વધી રહી છે. નિષ્ણાતોનું માનવું છે કે જો ક્રૂડ ઓઈલ લાંબા સમય સુધી 100 ડોલરની ઉપર રહેશે તો ચાલુ નાણાકીય વર્ષમાં ભારતની GDP વૃદ્ધિ અને કંપનીઓની કમાણી પર તેની અસર જોવા મળી શકે છે.

આ પણ વાંચો : Red Fort Blast: 13 આરોપીઓ સામે ચાર્જશીટ દાખલ, તપાસમાં આત્મઘાતી બોમ્બ વિસ્ફોટનો ખુલાસો