India Eu FTAથી વેપાર અને રોકાણને મળશે નવી દિશા, બર્લિનમાં પીયૂષ ગોયલે ગણાવ્યા મોટા અવસરો

India Eu FTA: કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે ભારત અને યુરોપિયન યુનિયન (EU) વચ્ચેના મુક્ત વેપાર કરાર (FTA)ની સંભાવનાઓ પર ભાર મૂક્યો છે. તેમણે જણાવ્યું કે આ કરાર બજારમાં પહોંચ વધારવા, સપ્લાય ચેઇન મજબૂત કરવા અને વેપાર તથા રોકાણ માટે નવા રસ્તા ખોલવામાં મદદરૂપ થઈ શકે છે. અહેવાલ મુજબ, આ કરાર વર્ષના અંત સુધીમાં થવાની સંભાવના વ્યક્ત કરવામાં આવી છે.

ભારતીય ઉદ્યોગો માટે નવી તકો

બર્લિનમાં ભારતીય વેપારી પ્રતિનિધિમંડળ સાથેની બેઠકને ગોયલે સાર્થક ગણાવી હતી. તેમણે ભારત-જર્મની ભાગીદારીમાં વધી રહેલી ગતિનો ઉલ્લેખ કરીને ખાસ કરીને સૂક્ષ્મ, લઘુ અને મધ્યમ ઉદ્યોગો (MSME)ને જર્મન ભાગીદારો સાથે લાંબા ગાળાના સંબંધો વિકસાવવા અપીલ કરી હતી.

તેમણે ટેક્સટાઇલ, ફાર્મા, એન્જિનિયરિંગ, રિન્યુએબલ એનર્જી અને નવી ટેક્નોલોજી જેવા ક્ષેત્રોમાં રહેલી તકોનો ઉલ્લેખ કર્યો હતો. સાથે જ ભારતીય ઉદ્યોગોને ગુણવત્તા, નિયમોનું પાલન અને વિશ્વસનીયતાના ઊંચા માપદંડ જાળવવા જણાવ્યું હતું.

AI અને અદ્યતન ટેક્નોલોજીમાં સહયોગ

ગોયલે જર્મનીની મુખ્ય સંશોધન સંસ્થાઓના વડાઓ સાથેની બેઠકમાં ભારત-જર્મની વચ્ચે સંશોધન, અદ્યતન ટેક્નોલોજી અને નવીનતાના ક્ષેત્રોમાં સહયોગ વધારવા ચર્ચા કરી હતી. તેમાં અદ્યતન સામગ્રી (Advanced Materials) અને આર્ટિફિશિયલ ઇન્ટેલિજન્સ (AI)માં સંયુક્ત પ્રયાસો વધારવા પર ભાર મૂકાયો હતો.

ફ્રાઉનહોફર સંસ્થાઓના પ્રતિનિધિઓ સાથેની ચર્ચામાં તેમણે જણાવ્યું કે જર્મનીની ચોકસાઈ આધારિત ટેક્નોલોજી અને ભારતની કુશળ પ્રતિભા સાથે મળીને ઓછા ખર્ચે નવીન ઉકેલો વિકસાવી શકે છે. સંશોધન સંસ્થાઓ, સ્ટાર્ટઅપ્સ, શૈક્ષણિક ક્ષેત્ર અને ઉદ્યોગો વચ્ચે સહયોગ વધારવાની પણ સંભાવના છે.

ભારતીય વિદ્યાર્થીઓ અને સંશોધકો સાથે સંવાદ

બર્લિનમાં ભારતીય વિજ્ઞાન અને ટેક્નોલોજીના સંશોધકો તથા વિદ્યાર્થીઓ સાથેની મુલાકાત દરમિયાન ગોયલે વિદેશમાં ભારતીય પ્રતિભાઓને મળતા સહયોગ અંગે તેમના વિચારો સાંભળ્યા હતા. તેમણે નવીનતા અને સ્ટાર્ટઅપ ક્ષેત્રે કાર્યરત ભારતીયોને આંતરરાષ્ટ્રીય વેપાર મેળા અને પ્રદર્શનોમાં મંચ અપાવવાનો વિશ્વાસ પણ વ્યક્ત કર્યો હતો.

તેમના મતે, ભારત-EU FTA અદ્યતન ઉત્પાદન, એન્જિનિયરિંગ, IT, ટેલિકોમ અને ટેક્નોલોજી આધારિત સેવાઓમાં બંને પક્ષોની પૂરક ક્ષમતાઓને જોડવાની તકો ઊભી કરી શકે છે.

આ પણ વાંચો : Gold Silver Priceમાં મોટો કડાકો! એક સપ્તાહમાં સોનું 3.5% અને ચાંદી 7.8% ઘટી, જાણો શું છે કારણ