ભારતનો આર્થિક વિકાસ દર સતત 7%થી વધુ, ઇન્ડોનેશિયા સાથે વેપાર અને રોકાણ વધારવાની મોટી તક

India Economic Growth Rate 2026: ભારતની મજબૂત આર્થિક વૃદ્ધિ પર વૈશ્વિક સ્તરે વિશ્વાસ વધી રહ્યો છે. આંકડા અને કાર્યક્રમ અમલીકરણ મંત્રાલયના સચિવ ડૉ. સૌરભ ગર્ગે રવિવારે જણાવ્યું હતું કે ભારત છેલ્લા ત્રણ વર્ષથી સતત 7 ટકાથી વધુનો આર્થિક વિકાસ દર નોંધાવી રહ્યું છે. ચાલુ નાણાકીય વર્ષના પ્રથમ ત્રિમાસિક ગાળામાં દેશનો વિકાસ દર 7.8 ટકા રહ્યો છે. તેમણે કહ્યું કે અર્થતંત્ર સાથે જોડાયેલા વિવિધ સંકેતો પણ સકારાત્મક વલણની પુષ્ટિ કરે છે. ભારતની મજબૂત આર્થિક સ્થિતિને ધ્યાનમાં રાખીને અનેક આંતરરાષ્ટ્રીય સંસ્થાઓ પણ દેશના વિકાસ દરના અંદાજમાં સુધારો કરી રહી છે. આ ભારતની આર્થિક નીતિઓ અને વિકાસ ક્ષમતામાં વધતા વૈશ્વિક વિશ્વાસનો સંકેત છે.

ભારત-ઇન્ડોનેશિયા વચ્ચે વેપાર વધારવાની તક

બીજી તરફ, ઇન્ડોનેશિયાના આંતરરાષ્ટ્રીય વેપાર અને બહુપક્ષીય સહયોગ મામલાનાં વિશેષ દૂત મરી એલ્કા પાંગુસ્તુએ ભારત અને ઇન્ડોનેશિયા વચ્ચે વેપાર તથા રોકાણ વધારવાની વિશાળ સંભાવનાઓ દર્શાવી હતી. તેમણે જણાવ્યું કે અમેરિકા વૈશ્વિક વેપારમાં ટેરિફનો ઉપયોગ આર્થિક નીતિના સાધન તરીકે કરવા માગતું હોય તો તે તેનો નિર્ણય છે, પરંતુ અન્ય દેશોએ એકબીજા સામે સંરક્ષણવાદી નીતિઓ અપનાવવી જોઈએ નહીં. તેમના જણાવ્યા અનુસાર, વૈશ્વિક વેપારમાં અમેરિકાનો હિસ્સો આશરે 13 ટકા છે, જ્યારે બાકીના 87 ટકા વેપાર અન્ય દેશો વચ્ચે થાય છે. તેથી દેશોએ પરસ્પર વેપાર અને રોકાણ વધારવા પર ધ્યાન આપવું જોઈએ.

સેમિકન્ડક્ટર અને ઇલેક્ટ્રિક વાહન ક્ષેત્રમાં સહયોગની શક્યતા

મરી એલ્કા પાંગુસ્તુએ કહ્યું કે ભારત અને ઇન્ડોનેશિયા વચ્ચે વસ્તુઓ તથા સેવાઓના વેપાર, પ્રવાસન અને ઉત્પાદન ક્ષેત્રમાં સહયોગ વધારી શકાય છે. ખાસ કરીને સેમિકન્ડક્ટર, ઓટોમોબાઇલ અને ઇલેક્ટ્રિક વાહન ઉદ્યોગમાં બંને દેશો માટે મોટી તકો છે. ઇન્ડોનેશિયા પાસે બેટરી ઉત્પાદન માટે જરૂરી મહત્ત્વપૂર્ણ ખનિજ સંસાધનો છે, જ્યારે ભારત પાસે વિશાળ બજાર અને ઉત્પાદન ક્ષમતા છે. આ બંને દેશો વચ્ચે ઇલેક્ટ્રિક વાહન ક્ષેત્રમાં પરસ્પર લાભદાયી ભાગીદારીનો માર્ગ ખોલી શકે છે. તેમણે ઉમેર્યું કે બદલાતા વૈશ્વિક વેપારના માહોલમાં ભારત અને ઇન્ડોનેશિયાએ દ્વિપક્ષીય સંબંધો તેમજ આસિયાન-ભારત સહયોગ હેઠળ વેપાર અને રોકાણની તકોનો વધુ ઉપયોગ કરવો જોઈએ.