Surat Crime News : સી.આર.પાટીલ સાથેની વાતચીતનો ઓડિયો વાયરલ કરનાર ‘છોટા યોગી’ સામે ગુનો નોંધાયો, એમ્બ્રોઈડરી શ્રમિકોના મુદ્દે મંત્રીને ફોન કર્યો હતો

Surat Crime News : ગોડાદરાના એક સામાજિક કાર્યકરની ફરિયાદના આધારે પોલીસે ‘છોટા યોગી’ તરીકે ઓળખાતા શખ્સ સામે તપાસ હાથ ધરી છે. સુરતમાં એમ્બ્રોઈડરીના શ્રમિકો પર થયેલા પોલીસ બળપ્રયોગના મામલે આ શખ્સે સીધો કેન્દ્રીય મંત્રી સી.આર. પાટીલનો સંપર્ક કર્યો હતો. આ દરમિયાન બંને વચ્ચે ફોન પર વાતચીત થઈ હતી. ત્યારબાદ આ વાતચીતનો ઓડિયો સોશિયલ મીડિયા પર વાયરલ થતાં મામલો ચર્ચામાં આવ્યો હતો.

આ કેસની તપાસ હાલ ચાલુ છે

ફોન કરનારે પોતાની ઓળખ કરણી સેનાના રાષ્ટ્રીય અધ્યક્ષ તરીકે આપી હોવાની માહિતી સામે આવી છે. ઇન્સ્ટાગ્રામ પર ‘iamchotayogijimaharaj’ નામનું એકાઉન્ટ ધરાવતા આ શખ્સે સુરત સહિત સમગ્ર ગુજરાતમાં મોટા પાયે આંદોલન કરવાની ચીમકી આપી હોવાનો પણ ઉલ્લેખ કરવામાં આવ્યો છે. વાયરલ થયેલી વાતચીત દરમિયાન ભાજપ સરકાર અને વડાપ્રધાન નરેન્દ્ર મોદી સામે સવાલો ઉઠાવવામાં આવ્યા હોવાની માહિતી છે.

આ ઉપરાંત સંબંધિત કાર્યવાહી બંધ કરવાની ચેતવણી આપવામાં આવી હોવાનો પણ દાવો કરવામાં આવ્યો છે. જોકે, વાયરલ ઓડિયોમાં થયેલી વાતચીતના સમગ્ર સંદર્ભ અંગે સત્તાવાર તપાસ બાદ વધુ સ્પષ્ટતા થઈ શકે છે.

ઓડિયો વાયરલ થતા પોલીસ આવી એકશનમાં

આ મામલે વિવાદ વધવાનું એક કારણ એ પણ છે કે ફોન પરની વાતચીતનો ઓડિયો વાયરલ કરવાની સાથે કેન્દ્રીય મંત્રી સી.આર. પાટીલનો મોબાઈલ નંબર પણ જાહેર કરવામાં આવ્યો હોવાનો આક્ષેપ છે. આ અંગે ગોડાદરાના સામાજિક કાર્યકરે પોલીસ સમક્ષ ફરિયાદ નોંધાવી છે. ફરિયાદના આધારે ગોડાદરા પોલીસે ‘છોટા યોગી’ સામે ગુનો નોંધી તપાસ શરૂ કરી છે. પોલીસ આ મામલે વાયરલ ઓડિયો, સોશિયલ મીડિયા એકાઉન્ટ અને મંત્રીનો મોબાઈલ નંબર જાહેર કરવાના આક્ષેપ સહિતનાં પાસાંની તપાસ કરી રહી છે.

હાલમાં આ કેસમાં તપાસ ચાલુ છે. પોલીસ તપાસમાં ઓડિયો વાયરલ કરવાની ઘટના, ફરિયાદમાં કરવામાં આવેલા આક્ષેપો અને સમગ્ર ઘટનાક્રમ અંગે વધુ વિગતો સામે આવે તેવી શક્યતા છે. તપાસ પૂર્ણ થયા બાદ જ મામલાની વધુ સ્પષ્ટ સ્થિતિ જાણી શકાશે.

આ પણ વાંચો : Gujarat Latest News Live : ગાંધીનગરમાં આજે કેબિનેટ બેઠક, વીજ સંકટ અને ઓછા વરસાદવાળા વિસ્તારો પર થશે ચર્ચા