Tarsadi Kosamba Rotary Club Navratri : તરસાડી-કોસંબા રોટરી ક્લબની અનોખી પહેલ! નવરાત્રિમાં 51 દીકરીઓનું પૂજન કરી અપાયો નારીશક્તિનો સંદેશ

Tarsadi Kosamba Rotary Club Navratri : સુરત જિલ્લાના તરસાડી-કોસંબા રોટરી ક્લબ દ્વારા નવરાત્રિ મહોત્સવમાં દીકરીઓના સન્માન અને નારીશક્તિના સંદેશ સાથે ભવ્ય દીકરી પૂજન કાર્યક્રમનું આયોજન કરવામાં આવ્યું હતું. આ કાર્યક્રમમાં 10 વર્ષથી નાની 51 દીકરીઓનું વિધિવત પૂજન કરીને માતૃશક્તિ પ્રત્યે આદર વ્યક્ત કરવામાં આવ્યો હતો.

કાર્યક્રમની શરૂઆતમાં સૌપ્રથમ કન્યા પૂજન કરવામાં આવ્યું હતું. દીકરીઓને શક્તિ સ્વરૂપા માની તેમની પૂજા-અર્ચના કરી આશીર્વાદ લેવામાં આવ્યા હતા. પૂજન બાદ તમામ 51 દીકરીઓને આકર્ષક ભેટ અને બિસ્કિટ આપવામાં આવ્યાં હતાં. ત્યારબાદ ખેલૈયાઓએ ગરબે ઘૂમીને નવરાત્રિની ઉજવણી કરી હતી.

તરસાડીના આગેવાનો અને નગરજનો કાર્યક્રમમાં ઉપસ્થિત રહ્યા

રોટરી ક્લબ દ્વારા યોજાયેલા આ કાર્યક્રમનો મુખ્ય હેતુ દીકરીઓનું સન્માન વધારવા અને સમાજમાં નારીશક્તિ પ્રત્યે સકારાત્મક સંદેશ પહોંચાડવાનો હતો. માતૃશક્તિને વધુ સશક્ત બનાવવાના આશયથી આયોજિત આ પહેલને ઉપસ્થિત લોકોએ આવકારી હતી.

કાર્યક્રમ દરમિયાન સ્થાનિક અગ્રણી દિલીપસિંહ રાઠોડ દ્વારા તેમના પોતાના સ્વરમાં ગાયેલા ગરબાનું લોન્ચિંગ પણ કરવામાં આવ્યું હતું. ખાસ વાત એ છે કે પ્રથમ નોરતે તેમણે આશરે 40 વર્ષ પહેલાં બનાવેલા ગરબાનું પણ ફરી લોન્ચિંગ કર્યું હતું. જૂની પરંપરા અને ગુજરાતી લોકસંસ્કૃતિને જાળવી રાખવાના પ્રયાસરૂપે ચાર તાળીનો ગરબો પણ રજૂ કરવામાં આવ્યો હતો.

નારીશક્તિ અને માતૃશક્તિને સશક્ત બનાવવાનો સંદેશ

નવરાત્રિ દરમિયાન ગરબાનું વિશેષ મહત્વ છે. પરંપરાગત ગરબા માત્ર ધાર્મિક ઉજવણી પૂરતા સીમિત નથી, પરંતુ ગુજરાતી સંસ્કૃતિ, સંગીત અને સામૂહિક એકતાનું પ્રતીક પણ છે. જૂના ગરબાને ફરી લોકો સુધી પહોંચાડવા અને પરંપરાગત શૈલીને જીવંત રાખવાના પ્રયાસથી કાર્યક્રમમાં સાંસ્કૃતિક રંગ ઉમેરાયો હતો. દીકરી પૂજન અને ગરબા લોન્ચિંગના આ કાર્યક્રમમાં તરસાડી નગરના આગેવાનો, વિવિધ હોદ્દેદારો અને મોટી સંખ્યામાં નગરજનો ઉપસ્થિત રહ્યા હતા.

કાર્યક્રમમાં ભક્તિ, પરંપરા અને દીકરીઓના સન્માનનો સુંદર સમન્વય જોવા મળ્યો હતો. આમ, તરસાડી-કોસંબા રોટરી ક્લબની આ પહેલે નવરાત્રિની ઉજવણીને વિશેષ અર્થ આપ્યો હતો. દીકરીઓનું સન્માન, નારીશક્તિનો સંદેશ અને પરંપરાગત ગરબાનું જતન આ ત્રણેય બાબતોને એક મંચ પર લાવીને આયોજકોએ સરાહનીય પ્રયાસ કર્યો હતો.

આ પણ વાંચો : Jamnagar Gulabnagar Motorcycle Fire Case : જામનગરમાં શખ્સે લોનના વિવાદમાં બાઇકને આગ ચાંપી? ગુલાબનગરમાં આરોપીની ધરપકડ