Mehsana: આરોગ્ય માળખાને મળશે વધુ મજબૂતી, 12 PHC માટે 31,957 ચો.મી. જમીન ફાળવાઈ

Mehsana: મહેસાણા જિલ્લામાં આરોગ્ય સેવાઓનો વ્યાપ વધારવા અને નાગરિકોને વધુ સારી આરોગ્ય સુવિધાઓ ઉપલબ્ધ કરાવવા રાજ્ય સરકાર દ્વારા મહત્વપૂર્ણ આયોજન કરવામાં આવી રહ્યું છે. વિધાનસભા ગૃહમાં આરોગ્ય માળખા અંગેના પ્રશ્નના જવાબમાં આરોગ્ય મંત્રી ઋષિકેશ પટેલે જણાવ્યું હતું કે, છેલ્લા બે વર્ષ દરમિયાન જિલ્લામાં પ્રાથમિક આરોગ્ય કેન્દ્રો (PHC), ડ્રગ અને વેક્સિન વેરહાઉસ તેમજ સબ-ડિસ્ટ્રિક્ટ હોસ્પિટલ માટે મોટા પાયે જમીન ફાળવવામાં આવી છે.

12 PHC માટે 31,957 ચોરસ મીટર જમીન

મહેસાણા જિલ્લાના વિવિધ તાલુકાઓમાં કુલ 12 પ્રાથમિક આરોગ્ય કેન્દ્રો (PHC) માટે અંદાજે 31,957 ચોરસ મીટર જમીન ફાળવવામાં આવી છે. જેમાં ઊંઝા, બહુચરાજી, મહેસાણા અને વડનગરમાં એક-એક PHC, જ્યારે જોટાણામાં બે PHC માટે જમીન ફાળવાઈ છે. આ ઉપરાંત વિજાપુર અને વિસનગર તાલુકામાં ત્રણ-ત્રણ PHC માટે જમીન ફાળવવામાં આવી છે.

દવા અને રસીના સંગ્રહ માટે પણ આયોજન

આરોગ્ય સેવાઓ સાથે દવાઓ અને રસીના યોગ્ય સંગ્રહ માટે પણ માળખું વિકસાવવામાં આવી રહ્યું છે. 31 માર્ચ 2026ની સ્થિતિએ છેલ્લા બે વર્ષમાં ડ્રગ વેરહાઉસ માટે 8,000 ચોરસ મીટર અને વેક્સિન વેરહાઉસ માટે 3,000 ચોરસ મીટર જમીન ફાળવવામાં આવી છે. આ સુવિધાઓથી જિલ્લામાં દવાઓ અને રસીના સંગ્રહ તથા વિતરણ વ્યવસ્થાને વધુ મજબૂતી મળવાની શક્યતા છે.

વિજાપુર અને સતલાસણામાં સબ-ડિસ્ટ્રિક્ટ હોસ્પિટલ

જિલ્લામાં વધુ મોટી આરોગ્ય સુવિધાઓ ઊભી કરવા માટે બે સ્થળોએ સબ-ડિસ્ટ્રિક્ટ હોસ્પિટલ માટે પણ જમીન ફાળવાઈ છે. વિજાપુરમાં 30,000 ચોરસ મીટર અને સતલાસણામાં 20,000 ચોરસ મીટર, એટલે કે કુલ 50,000 ચોરસ મીટર જમીન ફાળવવામાં આવી છે.

ગ્રામ્ય વિસ્તારોમાં સારવારની સુવિધા વધશે

સરકારના આ આયોજનથી મહેસાણા જિલ્લાના ગ્રામ્ય તેમજ શહેરી વિસ્તારોમાં આરોગ્યલક્ષી પાયાની સુવિધાઓ વધુ મજબૂત બનશે. નવા PHC, વેરહાઉસ અને સબ-ડિસ્ટ્રિક્ટ હોસ્પિટલ માટેની જમીન ફાળવણી બાદ આરોગ્ય સેવાઓનું વિસ્તરણ થઈ શકે છે અને સ્થાનિક લોકોને નજીકમાં ઝડપી સારવાર મળી રહે તેવી વ્યવસ્થા વિકસાવવાનો સરકારનો હેતુ છે.

આ પણ વાંચો : 80s AI Photo Trend: AI ફોટો ટ્રેન્ડ! સેલ્ફીથી બની રહ્યા છે જૂના જમાનાના રેટ્રો પોર્ટ્રેટ, મંત્રીઓ પણ થયા ક્રેઝી