Mahuva Sugar Millની ચૂંટણીમાં રાજકીય ગરમાવો ચરમસીમાએ, ભાજપ સામે ભાજપનો જંગ! 15 ઝોનમાં રસાકસી
Mahuva Sugar Mill
Mahuva Sugar Millની ચૂંટણીમાં રાજકીય ગરમાવો ચરમસીમાએ, ભાજપ સામે ભાજપનો જંગ! 15 ઝોનમાં રસાકસી
Mahuva Sugar Mill
Mahuva Sugar Mill: મહુવા સુગર મિલની વ્યવસ્થાપક સમિતિની ચૂંટણીને લઈને રાજકીય ગરમાવો ચરમસીમાએ પહોંચ્યો છે. આજે ઉમેદવારી પત્રો ભરાતા જ ચૂંટણીનું ચિત્ર વધુ સ્પષ્ટ બન્યું છે અને સૌથી ચર્ચાસ્પદ બાબત એ છે કે અનેક બેઠકો પર ભાજપ સામે ભાજપના જ ઉમેદવારો વચ્ચે સીધી ટક્કર જોવા મળી રહી છે. વર્તમાન પ્રમુખ અને સુમુલ ડેરીના પૂર્વ પ્રમુખ માનસિંગ પટેલના જૂના બોર્ડના તમામ સભ્યોએ ફરી ઉમેદવારી નોંધાવી છે, ત્યારે અનેક ઝોનમાં નવા ચહેરાઓ મેદાનમાં ઉતરતા ચૂંટણી જંગ વધુ રસપ્રદ બન્યો છે.
15 ઝોનમાં ચૂંટણીનો જંગ
મહુવા સુગર મિલમાં અંદાજે 22 હજાર સભાસદો છે. જોકે, તેમાંથી આશરે 5,090 ઉત્પાદક સભાસદો જ આ ચૂંટણીમાં મતદાન કરી શકશે. કુલ 15 ઝોનમાં ચૂંટણીનો જંગ જામ્યો છે. હવે કયા ઝોનમાં કયું રાજકીય સમીકરણ કામ કરશે અને કોને મતદારોનો સાથ મળશે તેના પર સૌની નજર છે.
મહુવા ઝોનમાં જોરદાર ટક્કરના એંધાણ
ચૂંટણીમાં સૌથી વધુ ચર્ચા મહુવા ઝોનની થઈ રહી છે. અહીં વર્તમાન ડિરેક્ટર જીગર નાયક સામે આદિવાસી ઉમેદવાર અને મહુવા ગ્રામ પંચાયતના સરપંચ અનિલ પટેલે ઉમેદવારી નોંધાવી છે. બંને વચ્ચે સીધી ટક્કર થવાના સંકેતોને કારણે આ બેઠક પર ચૂંટણી જંગ રસપ્રદ બન્યો છે.
વલવાડા ઝોનમાં પણ બદલાયા સમીકરણો
બીજી તરફ વલવાડા ઝોનમાં પણ રાજકીય સમીકરણો બદલાયા છે. અહીં વર્તમાન ડિરેક્ટર અને પ્રદેશ આદિજાતિ ઉપપ્રમુખ રાકેશ પટેલ સામે મહુવાના ધારાસભ્ય મોહન ધોડિયાના પુત્ર જયમીન પટેલે ઉમેદવારી નોંધાવી છે. આ મુકાબલાને કારણે વલવાડા ઝોનની ચૂંટણી પર પણ ખાસ નજર રહેશે.
માનસિંગ પટેલ માટે પ્રતિષ્ઠાનો જંગ?
એક તરફ વર્તમાન પ્રમુખ માનસિંગ પટેલ તેમના જૂના બોર્ડના સભ્યો સાથે ફરી ચૂંટણી મેદાનમાં ઉતર્યા છે, તો બીજી તરફ અનેક ઝોનમાં તેમના જ રાજકીય વર્તુળ સાથે સંકળાયેલા ઉમેદવારો સામે પડકાર ઊભો થયો છે. આથી સમગ્ર ચૂંટણીમાં ‘ભાજપ સામે ભાજપ’ના જંગનું ચિત્ર વધુ સ્પષ્ટ બની રહ્યું છે. માનસિંગ પટેલ માટે આ ચૂંટણી ખાસ મહત્વની માનવામાં આવી રહી છે, કારણ કે તેઓ પોતાની છેલ્લી ચૂંટણી લડી રહ્યા હોવાનું જણાવાઈ રહ્યું છે.
27મીએ મતદાન, 29મીએ પરિણામ
હવે ઉમેદવારી પત્રો ભરાઈ ગયા બાદ મહુવા સુગર મિલની ચૂંટણીમાં આગળની પ્રક્રિયા તરફ સૌની નજર છે. 27 તારીખે મતદાન યોજાશે, જ્યારે 29 તારીખે મતગણતરી હાથ ધરાશે. મતદાન અને ત્યારબાદની મતગણતરી બાદ જ નક્કી થશે કે મહુવા સુગર મિલની વ્યવસ્થાપક સમિતિ પર કોનો કબજો રહેશે.
હાલમાં તો સહકારી ક્ષેત્રની આ ચૂંટણી ધીમે ધીમે રાજકીય પ્રતિષ્ઠાના જંગમાં ફેરવાઈ રહી છે અને ભાજપના જ બે જૂથો વચ્ચેની ટક્કરે મહુવા સુગર મિલની ચૂંટણીનો માહોલ ગરમાવી દીધો છે.
