Junagadh Fake Ghee: જૂનાગઢમાં ભેળસેળવાળા ઘીનો પર્દાફાશ! 300 કિલોથી વધુ જથ્થો ઝડપાયો

Junagadh Fake Ghee: જૂનાગઢમાં દિવાળીના તહેવાર પહેલાં ભેળસેળવાળા અને ડુપ્લિકેટ ઘીના જથ્થાનો પર્દાફાશ થયો છે. માર્કેટિંગ યાર્ડ પાસેથી સ્પેશિયલ ઑપરેશન ગ્રુપ (SOG) પોલીસે બાતમીના આધારે દરોડો પાડીને 300 કિલોથી વધુ ઘીનો જથ્થો ઝડપી પાડ્યો હતો. આ કાર્યવાહીથી તહેવારો દરમિયાન બજારમાં વેચાતા ખાદ્ય પદાર્થોની ગુણવત્તા સામે સવાલો ઊભા થયા છે.

SOG પોલીસની બાતમીના આધારે કાર્યવાહી

મળતી માહિતી મુજબ, જૂનાગઢ માર્કેટિંગ યાર્ડ નજીક ભેળસેળવાળા અને ડુપ્લિકેટ ઘીનો જથ્થો હોવાની બાતમી પોલીસને મળી હતી. તેના આધારે SOG પોલીસની ટીમે દરોડો પાડ્યો હતો. આ કાર્યવાહી દરમિયાન 300 કિલોથી વધુ ઘીનો જથ્થો મળી આવ્યો હતો. દરોડા દરમિયાન અલગ-અલગ સાત નામની બ્રાન્ડના લેબલ ધરાવતી પ્લાસ્ટિકની બરણીઓ પણ મળી આવી હતી. આ જથ્થો કયા સ્થળેથી લાવવામાં આવ્યો હતો, તેનું વેચાણ ક્યાં થવાનું હતું અને તેમાં કયા પ્રકારની ભેળસેળ કરવામાં આવી હતી તે સહિતના મુદ્દાઓની તપાસ મહત્ત્વપૂર્ણ બની છે.

ફૂડ એન્ડ ડ્રગ્સ વિભાગની કામગીરી સામે સવાલો

આ મામલે ખાદ્ય સુરક્ષાની દેખરેખ રાખતા ફૂડ એન્ડ ડ્રગ્સ વિભાગની કામગીરી સામે પણ સવાલો ઊભા થયા છે. પોલીસ દ્વારા દરોડો પાડીને જથ્થો પકડવામાં આવ્યા બાદ ફૂડ એન્ડ ડ્રગ્સ વિભાગને જાણ કરવામાં આવી હોવાનું જાણવા મળ્યું છે. દિવાળીના તહેવારો દરમિયાન ઘી, મીઠાઈ અને અન્ય ખાદ્ય પદાર્થોની માગમાં વધારો થાય છે. આવા સમયે ભેળસેળવાળા ખાદ્ય પદાર્થોનું વેચાણ લોકોના આરોગ્ય માટે જોખમી બની શકે છે. તેથી ખાદ્ય પદાર્થોની ગુણવત્તાની તપાસ અને નિયમિત દેખરેખ જરૂરી છે.

તપાસ બાદ વધુ વિગતો સામે આવશે

હાલમાં ઝડપાયેલા ઘીના જથ્થાની ગુણવત્તા, તેની બનાવટ અને તેમાં ભેળસેળ થઈ છે કે નહીં તે અંગેની સત્તાવાર પુષ્ટિ તપાસ અને લેબોરેટરી રિપોર્ટ બાદ જ થઈ શકશે. આ જથ્થા પાછળ કોણ જવાબદાર છે અને તેના વેચાણનું નેટવર્ક કેટલું વિસ્તરેલું છે તે પણ તપાસનો વિષય છે. જૂનાગઢમાં SOG પોલીસની આ કાર્યવાહીથી તહેવારો પહેલાં ખાદ્ય પદાર્થોમાં થતી સંભવિત ભેળસેળ સામે સતર્કતા વધારવાની જરૂરિયાત ફરી એકવાર સામે આવી છે.

આ પણ વાંચો: Amreli News: આંબરડી નજીક LPG ગેસ ભરેલું ટેન્કર પલટ્યુ, ડ્રાઈવર ગંભીર રીતે ઘાયલ