Gujaratમાં રેશન વિતરણ ખોરવાયું! ઓનલાઇન સર્વર ખોટકાતાં ચોથા દિવસે પણ 72 લાખથી વધુ કાર્ડધારકો પરેશાન

Gujarat Ration Distribution Delay: અમદાવાદ સહિત સમગ્ર ગુજરાતમાં રેશન વિતરણની ઓનલાઇન પ્રક્રિયા ખોરવાતાં લાખો રેશનકાર્ડ ધારકો મુશ્કેલીમાં મુકાયા છે. ઓક્ટોબર મહિનાની 4 તારીખ થઈ હોવા છતાં રાજ્યમાં રેશન વિતરણ શરૂ થઈ શક્યું નથી. ઓનલાઇન સર્વરની સમસ્યાને કારણે NFSA, અંત્યોદય અને BPL સહિતના 72 લાખથી વધુ રેશનકાર્ડ ધારકોને નિયત જથ્થો મેળવવા માટે રાહ જોવી પડી રહી છે. બીજી તરફ, રેશનની દુકાનોમાં જથ્થો ઉપલબ્ધ હોવા છતાં વિતરણ ન થઈ શકતાં દુકાનદારો અને કાર્ડધારકો વચ્ચે ઘર્ષણની સ્થિતિ સર્જાઈ રહી છે.

દુકાનોમાં જથ્થો પહોંચ્યો, છતાં વિતરણ બંધ

રાજ્યની 17 હજારથી વધુ રેશનની દુકાનોમાં ઓક્ટોબર મહિનાનો નિયમિત જથ્થો પહોંચાડી દેવામાં આવ્યો છે. દિવાળીના તહેવારોને ધ્યાનમાં રાખીને વધારાની ખાંડ, સિંગતેલ, ચણા, તુવેર દાળ અને મગ સહિતની ચીજવસ્તુઓ પણ દુકાનો સુધી પહોંચાડવામાં આવી છે. જોકે, ગુજરાત રાજ્ય નાગરિક પુરવઠા વિભાગની ઓનલાઇન સિસ્ટમમાં વિતરણની પ્રક્રિયા શરૂ ન થતાં દુકાનદારો કાર્ડધારકોને અનાજ અને અન્ય ચીજવસ્તુઓ આપી શકતા નથી. પરિણામે, દુકાનોમાં જથ્થો હોવા છતાં લાભાર્થીઓને ખાલી હાથે પરત ફરવું પડી રહ્યું છે.

ચોથા દિવસે પણ કાર્ડધારકોના ધક્કા

ઓક્ટોબર મહિનાના રેશન વિતરણમાં સતત વિલંબ થતાં કાર્ડધારકોમાં નારાજગી જોવા મળી રહી છે. 4 ઓક્ટોબરે પણ અનેક રેશનકાર્ડ ધારકો દુકાનો પર પહોંચ્યા હતા, પરંતુ ઓનલાઇન વિતરણ શરૂ ન થયું હોવાનું જણાવાતાં તેમને પરત ફરવું પડ્યું હતું. વારંવાર દુકાનોના ધક્કા ખાવા પડતા કેટલાક સ્થળોએ કાર્ડધારકો અને રેશન દુકાન સંચાલકો વચ્ચે બોલાચાલી તથા ઘર્ષણની સ્થિતિ સર્જાઈ હતી. જોકે, દુકાનદારો પણ ઓનલાઇન પોર્ટલ શરૂ ન થવાને કારણે લાચાર બન્યા છે.

દિવાળીનો વધારાનો જથ્થો પણ અટવાયો

દિવાળીના તહેવારો પહેલાં કાર્ડધારકોને વધારાની ખાંડ, સિંગતેલ, ચણા, તુવેર દાળ અને મગ સહિતની ચીજવસ્તુઓનો લાભ આપવાનું આયોજન છે. પરંતુ ઓનલાઇન વિતરણ પ્રક્રિયા શરૂ ન થતાં આ જથ્થો પણ દુકાનોમાં અટવાઈ ગયો છે. તહેવારો નજીક આવી રહ્યા છે ત્યારે રેશન વિતરણમાં થઈ રહેલા વિલંબને કારણે લાભાર્થીઓમાં ચિંતા વધી છે. સમયસર વિતરણ શરૂ નહીં થાય તો તહેવારો પહેલાં જથ્થો મેળવવામાં વધુ મુશ્કેલી સર્જાઈ શકે છે.

વર્ષો બાદ તેલિયા ચોખાનું વિતરણ પણ અટક્યું

ઓક્ટોબર મહિનામાં વર્ષો બાદ પ્રથમ વખત રેશનકાર્ડ ધારકોને તેલિયા ચોખાનું વિતરણ પણ થવાનું છે. આ ચોખાનો જથ્થો પણ રેશનની દુકાનો સુધી પહોંચાડવામાં આવ્યો હોવાનું જાણવા મળે છે. જોકે, ઓનલાઇન પ્રક્રિયા શરૂ ન થતાં ચોખાના વિતરણ પર પણ અસર પડી છે. આગામી દિવસોમાં પણ સિસ્ટમ શરૂ નહીં થાય તો તેલિયા ચોખાના વિતરણને લઈને કાર્ડધારકો અને દુકાનદારો વચ્ચે રકઝક થવાની શક્યતા વ્યક્ત કરવામાં આવી રહી છે.

સર્વરની સમસ્યા દૂર કરી વિતરણ શરૂ કરવાની માંગ

સમગ્ર ગુજરાતમાં રેશન વિતરણ વ્યવસ્થા ઓનલાઇન સિસ્ટમ પર નિર્ભર હોવાથી સર્વરની સમસ્યાને કારણે હજારો દુકાનોમાં વિતરણ અટકી ગયું છે. રેશનકાર્ડ ધારકો અને દુકાન સંચાલકો દ્વારા નાગરિક પુરવઠા વિભાગ સમક્ષ ઓનલાઇન સર્વરની સમસ્યા તાત્કાલિક દૂર કરીને વિતરણ પ્રક્રિયા શરૂ કરવાની માંગ ઊઠી છે. હવે વિભાગ દ્વારા આ સમસ્યાનું નિરાકરણ ક્યારે લાવવામાં આવે છે અને 72 લાખથી વધુ કાર્ડધારકોને ઓક્ટોબર મહિનાનો જથ્થો ક્યારે મળવાનું શરૂ થાય છે તેના પર સૌની નજર છે.