ભારતના વિદેશી મુદ્રા ભંડારમાં જોરદાર ઉછાળો, પહેલીવાર 785 અબજ ડોલરને પાર

India Forex Reserves 2026: ભારતના વિદેશી મુદ્રા ભંડાર (Forex Reserves)માં સતત બીજા સપ્તાહે જોરદાર વધારો નોંધાયો છે. ભારતીય રિઝર્વ બેંક (RBI) દ્વારા જાહેર કરવામાં આવેલા આંકડા મુજબ, 4 સપ્ટેમ્બરે પૂર્ણ થયેલા સપ્તાહ દરમિયાન ભારતનું વિદેશી મુદ્રા ભંડાર 44.90 અબજ ડોલર વધીને રેકોર્ડ 785.71 અબજ ડોલર થઈ ગયું છે.

એક સપ્તાહમાં 44.90 અબજ ડોલરનો વધારો

આ પહેલાં 28 ઓગસ્ટે પૂર્ણ થયેલા સપ્તાહમાં પણ દેશના વિદેશી મુદ્રા ભંડારમાં 11.47 અબજ ડોલરનો વધારો થયો હતો અને તે 740.80 અબજ ડોલર પર પહોંચ્યું હતું. આમ, સતત બીજા સપ્તાહે ભારતના વિદેશી મુદ્રા ભંડારમાં મોટો વધારો થયો છે.

વિદેશી ચલણની સંપત્તિમાં મોટો ઉછાળો

વિદેશી મુદ્રા ભંડારમાં સૌથી મોટો હિસ્સો Foreign Currency Assets (FCA)નો હોય છે. 4 સપ્ટેમ્બરે પૂર્ણ થયેલા સપ્તાહ દરમિયાન FCAમાં 47.498 અબજ ડોલરનો વધારો નોંધાયો હતો. આ સાથે FCA વધીને 648.17 અબજ ડોલર થઈ ગયું છે. માર્ચ 2026ના અંતની સરખામણીમાં FCAમાં 95.886 અબજ ડોલરનો વધારો થયો છે, જ્યારે એક વર્ષ અગાઉની સરખામણીએ તેમાં 63.692 અબજ ડોલરની વૃદ્ધિ નોંધાઈ છે.

સોનાના ભંડારમાં ઘટાડો

બીજી તરફ, આ સમયગાળા દરમિયાન ભારતના સોનાના ભંડારમાં ઘટાડો નોંધાયો છે. સપ્તાહ દરમિયાન ગોલ્ડ રિઝર્વ 2.594 અબજ ડોલર ઘટીને 113.816 અબજ ડોલર રહ્યું છે. માર્ચ 2026ના અંતની સરખામણીએ સોનાના ભંડારમાં 1.580 અબજ ડોલરનો ઘટાડો થયો છે. જોકે, એક વર્ષ અગાઉની સરખામણીએ ગોલ્ડ રિઝર્વ હજુ પણ 23.517 અબજ ડોલર વધારે છે.

IMFમાં ભારતની સ્થિતિ પણ મજબૂત

આંતરરાષ્ટ્રીય મુદ્રા કોષ (IMF) પાસે ભારતના Special Drawing Rights (SDRs)માં પણ સામાન્ય ઘટાડો નોંધાયો છે. SDRs 4 મિલિયન ડોલર ઘટીને 18.806 અબજ ડોલર રહ્યા છે. જોકે, માર્ચ 2026ના અંતની સરખામણીએ SDRsમાં 184 મિલિયન ડોલર અને એક વર્ષ અગાઉની સરખામણીએ 64 મિલિયન ડોલરનો વધારો થયો છે. IMFમાં ભારતની રિઝર્વ પોઝિશન 2 મિલિયન ડોલર વધીને 4.916 અબજ ડોલર થઈ છે. માર્ચના અંતની સરખામણીએ તેમાં 108 મિલિયન ડોલર અને એક વર્ષ અગાઉની સરખામણીએ 168 મિલિયન ડોલરનો વધારો થયો છે.

માર્ચથી અત્યાર સુધી 94.599 અબજ ડોલરનો વધારો

કુલ મળીને ભારતનું વિદેશી મુદ્રા ભંડાર માર્ચ 2026ના અંતથી 94.599 અબજ ડોલર વધ્યું છે. જ્યારે એક વર્ષ અગાઉની સરખામણીએ તેમાં 87.438 અબજ ડોલરનો વધારો નોંધાયો છે. વિદેશી મુદ્રા ભંડારમાં આ ઐતિહાસિક વધારો ભારતની બાહ્ય નાણાકીય સ્થિતિ માટે મહત્વપૂર્ણ માનવામાં આવી રહ્યો છે.