LPG Price Today:  આંતરરાષ્ટ્રીય બજારમાં LPGના ભાવમાં સતત વધારો થઈ રહ્યો હોવા છતાં ભારતના ગ્રાહકોને હજુ પણ ઘરેલુ ગેસ સિલિન્ડર તુલનાત્મક રીતે ઓછી કિંમતે મળી રહ્યો છે. પેટ્રોલિયમ અને પ્રાકૃતિક ગેસ મંત્રાલયના જણાવ્યા અનુસાર 14.2 કિલોગ્રામના એક ઘરેલુ LPG સિલિન્ડરને ગ્રાહકના ઘર સુધી પહોંચાડવાનો ખર્ચ હવે ₹1600થી વધુ થઈ ગયો છે, પરંતુ ગ્રાહકો પાસેથી તેની સામે ઘણો ઓછો ભાવ લેવામાં આવે છે. આ કારણે સરકાર અને જાહેર ક્ષેત્રની ઓઇલ માર્કેટિંગ કંપનીઓને દરેક સિલિન્ડર પર અંદાજે ₹700 જેટલું નુકસાન સહન કરવું પડી રહ્યું છે.

વૈશ્વિક સ્તરે ખાસ કરીને મધ્યપૂર્વમાં વધતા તણાવ અને હોર્મુઝ જળમાર્ગમાં સપ્લાય સંબંધિત અનિશ્ચિતતાને કારણે LPGના આંતરરાષ્ટ્રીય ભાવમાં નોંધપાત્ર વધારો થયો છે. ફેબ્રુઆરીમાં સાઉદી અરામકોનો LPG કોન્ટ્રાક્ટ ભાવ 542.50 ડોલર પ્રતિ ટન હતો, જે એપ્રિલમાં વધીને 775 ડોલર અને જૂનમાં 790 ડોલર પ્રતિ ટન સુધી પહોંચી ગયો છે.

ભારતના મુખ્ય શહેરોમાં ઘરેલુ LPG સિલિન્ડરના ભાવમાં પણ થોડો તફાવત જોવા મળે છે. દિલ્હીમાં 14.2 કિલોગ્રામના ઘરેલુ સિલિન્ડરની કિંમત ₹942 છે, જ્યારે મુંબઈમાં ₹941.50, કોલકાતામાં ₹968 અને ચેન્નાઈમાં ₹957.50 છે. બેંગલુરુમાં ગ્રાહકોને ₹944.50, લખનૌમાં ₹979.50 અને પટણામાં ₹1031.50 ચૂકવવા પડે છે. બીજી તરફ કોમર્શિયલ સિલિન્ડરના ભાવ ઘરેલુ સિલિન્ડરની સરખામણીએ ઘણાં વધુ છે.

મંત્રાલયના જણાવ્યા મુજબ, ઘરેલુ LPG પર થતી કુલ અંડર-રિકવરી નાણાકીય વર્ષ 2025-26ના અંત સુધીમાં આશરે ₹60,000 કરોડ સુધી પહોંચી ગઈ છે. આ બોજ ઘટાડવા માટે કેન્દ્ર સરકારે ઓઇલ માર્કેટિંગ કંપનીઓને ₹30,000 કરોડની સહાય આપવાની મંજૂરી આપી છે.

તાજેતરમાં ઘરેલુ LPG સિલિન્ડરના ભાવમાં ₹29નો વધારો કરવામાં આવ્યો હોવા છતાં, ગ્રાહકો હજુ પણ વાસ્તવિક ખર્ચ કરતાં ઘણી ઓછી કિંમત ચૂકવી રહ્યા છે. સરકારનું કહેવું છે કે વૈશ્વિક ભાવવધારા વચ્ચે પણ ભારતમાં LPGના ભાવ વિશ્વના અનેક દેશોની સરખામણીએ સૌથી નીચા સ્તરે જાળવી રાખવામાં આવ્યા છે.