ભારતીય સેના પોતાની આધુનિક યુદ્ધ ક્ષમતાઓને સતત મજબૂત બનાવી રહી છે. આ દિશામાં સેનાને વધુ એક મોટી સફળતા મળી છે. ભારતીય રક્ષા ક્ષેત્રની કંપની SMPPએ ભારતીય સેનાને સ્વદેશી ટેક્નોલોજીથી તૈયાર કરાયેલા 106 "પીસકીપર (અગ્નિવેગ)" જેટ આધારિત કામિકાઝે ડ્રોનની ડિલિવરી પૂર્ણ કરી છે. આ નવા ડ્રોનના સમાવેશથી સેનાની હુમલાખોર ક્ષમતા અને ડ્રોન પાવરમાં નોંધપાત્ર વધારો થયો છે.

મળતી માહિતી મુજબ, સેનાને સોંપવામાં આવેલા કુલ 106 ડ્રોનમાં 100 ઓપરેશનલ ડ્રોન અને 6 ટ્રેનિંગ સિસ્ટમનો સમાવેશ થાય છે. આ ડ્રોન ખાસ કરીને દુશ્મનના મહત્વપૂર્ણ ઠેકાણાઓને નિશાન બનાવી ચોક્કસ અને ઘાતક હુમલો કરવા માટે તૈયાર કરવામાં આવ્યા છે.

'પીસકીપર (અગ્નિવેગ)' સંપૂર્ણપણે સ્વદેશી ટેક્નોલોજી પર આધારિત ટર્બોજેટ કામિકાઝે ડ્રોન છે. તેની સૌથી મોટી ખાસિયત તેની લાંબી હુમલાખોર ક્ષમતા છે. આ ડ્રોન દુશ્મનના વિસ્તારમાં અંદાજે  180 કિલોમીટર સુધી અંદર પ્રવેશીને હુમલો કરી શકે છે. ઉપરાંત, તે પ્રતિ કલાક 450 કિલોમીટર સુધીની ઝડપે ઉડાન ભરવાની ક્ષમતા ધરાવે છે, જેના કારણે દુશ્મનને પ્રતિસાદ આપવાનો સમય ખૂબ જ ઓછો મળે છે.

આ ડ્રોનની ચોકસાઈ પણ અત્યંત પ્રભાવશાળી માનવામાં આવે છે. પરીક્ષણ દરમિયાન તેની CEP (Circular Error Probable) 5 મીટરથી પણ ઓછી નોંધાઈ હતી. એટલે કે, નિર્ધારિત લક્ષ્યને અત્યંત ઓછી ભૂલ સાથે નિશાન બનાવી શકાય છે, જે આધુનિક યુદ્ધમાં ખૂબ જ મહત્વપૂર્ણ માનવામાં આવે છે.

ખાસ વાત એ છે કે 'અગ્નિવેગ'ને ઇલેક્ટ્રોનિક યુદ્ધની પડકારજનક પરિસ્થિતિઓને ધ્યાનમાં રાખીને વિકસાવવામાં આવ્યો છે. દુશ્મન દ્વારા કરવામાં આવતા ઇલેક્ટ્રોનિક જામિંગ અને સ્પૂફિંગ જેવા પ્રયાસો સામે પણ આ ડ્રોન અસરકારક રીતે કાર્ય કરી શકે છે અને પોતાનું મિશન સફળતાપૂર્વક પૂર્ણ કરવાની ક્ષમતા ધરાવે છે.

વિશેષજ્ઞોના મતે, 'અગ્નિવેગ' જેવા સ્વદેશી કામિકાઝે ડ્રોનનો સમાવેશ ભારતીય સેનાની આત્મનિર્ભરતા તરફનું મહત્વપૂર્ણ પગલું છે. ભવિષ્યના યુદ્ધમાં ડ્રોન ટેક્નોલોજી નિર્ણાયક ભૂમિકા ભજવશે ત્યારે આવા અદ્યતન ડ્રોન ભારતની રક્ષા ક્ષમતાને નવી ઊંચાઈએ પહોંચાડશે.