નવી દિલ્હી: દેશના યુવાનો માટે રોજગાર સર્જનને પ્રોત્સાહન આપવા કેન્દ્ર સરકારની મહત્વાકાંક્ષી વિકસિત ભારત રોજગાર યોજના (PM-VBRY) હેઠળ વડાપ્રધાન નરેન્દ્ર મોદી 19 જૂને લગભગ ₹2400 કરોડની પ્રોત્સાહક રકમ જારી કરશે. વડાપ્રધાન કાર્યાલય (PMO) દ્વારા આ અંગે સત્તાવાર માહિતી આપવામાં આવી છે. સરકારના જણાવ્યા મુજબ, યોજનાની શરૂઆતથી અત્યાર સુધીમાં દેશભરમાં લગભગ 15 લાખથી વધુ રોજગાર તકોના સર્જનમાં મદદ મળી છે. આ યોજના કર્મચારીઓ અને નોકરીદાતાઓને ઔપચારિક અર્થતંત્ર સાથે જોડવા માટે પ્રોત્સાહન પૂરું પાડે છે.

પ્રથમ વખત નોકરી મેળવનારને મળશે સીધો લાભ
યોજનાના નિયમો અનુસાર પ્રથમ વખત નોકરી શરૂ કરનારા યુવાનોને ₹15,000 સુધીની પ્રોત્સાહક સહાય આપવામાં આવે છે. આ સહાયથી યુવાનોને કારકિર્દીની શરૂઆતમાં આર્થિક મજબૂતી મળે છે. બીજી તરફ, નવા કર્મચારીઓને નોકરી આપતા નોકરીદાતાઓને પણ સરકાર તરફથી પ્રતિ કર્મચારી દર મહિને ₹3,000 સુધીનું પ્રોત્સાહન આપવામાં આવે છે.

મેન્યુફેક્ચરિંગ ક્ષેત્રને ખાસ પ્રોત્સાહન
સરકારે મેન્યુફેક્ચરિંગ ક્ષેત્રને રોજગાર સર્જન માટે મહત્વપૂર્ણ ગણાવી આ ક્ષેત્રના નોકરીદાતાઓને ચાર વર્ષ સુધી પ્રોત્સાહન આપવાની જોગવાઈ કરી છે. જ્યારે અન્ય ક્ષેત્રોને બે વર્ષ સુધી આ લાભ મળશે.

3.5 કરોડ રોજગાર સર્જનનો લક્ષ્યાંક
ઓગસ્ટ 2025થી અમલમાં આવેલી આ યોજના માટે સરકાર દ્વારા કુલ ₹99,446 કરોડનો ખર્ચ નક્કી કરવામાં આવ્યો છે. આગામી બે વર્ષમાં 3.5 કરોડથી વધુ રોજગાર તકોનું સર્જન કરવાનો લક્ષ્યાંક રાખવામાં આવ્યો છે. સરકારી આંકડા મુજબ, યોજનાના લાભાર્થીઓમાં લગભગ 1.92 કરોડ યુવાનો એવા હશે, જેઓ પ્રથમ વખત ઔપચારિક નોકરીમાં જોડાશે.

વિકસિત ભારતના સપનાને મળશે બળ
કેન્દ્ર સરકારનું માનવું છે કે આ યોજના રોજગાર આધારિત વિકાસને વેગ આપશે, સામાજિક સુરક્ષા મજબૂત બનાવશે અને યુવાનોને ગુણવત્તાયુક્ત નોકરીની તક આપીને ‘વિકસિત ભારત’ના વિઝનને સાકાર કરવામાં મહત્વપૂર્ણ યોગદાન આપશે.