જયપુર: રાજસ્થાનના બાલોતરામાં આયોજિત કાર્યક્રમ દરમિયાન વડાપ્રધાન નરેન્દ્ર મોદીએ વૈશ્વિક ઊર્જા સંકટ અને ભારત દ્વારા અપનાવવામાં આવેલી વ્યૂહરચના અંગે મહત્વપૂર્ણ નિવેદન આપ્યું. તેમણે જણાવ્યું કે પશ્ચિમ એશિયામાં સર્જાયેલા યુદ્ધના કારણે સમગ્ર વિશ્વમાં ઈંધણ પુરવઠા પર ગંભીર અસર પડી હતી, પરંતુ ભારતે સમયસર લીધેલા નિર્ણયો અને અસરકારક કૂટનીતિના કારણે સંભવિત સંકટને સફળતાપૂર્વક ટાળી દીધું. PM મોદીએ કહ્યું કે 21મી સદીના સૌથી મોટા ઊર્જા સંકટ સામે નવા ભારતની ઇચ્છાશક્તિ, આયોજન અને સંકલિત પ્રયાસો વધુ શક્તિશાળી સાબિત થયા છે. ભારતે યોગ્ય સમયે પરિસ્થિતિનું મૂલ્યાંકન કરીને વૈકલ્પિક વ્યવસ્થાઓ ઉભી કરી અને ઈંધણ પુરવઠો જાળવી રાખવામાં સફળતા મેળવી.

LPG સપ્લાય પર પડ્યો હતો મોટો ખતરો
વડાપ્રધાને જણાવ્યું કે ભારતની LPG જરૂરિયાતનો મોટો હિસ્સો આયાત દ્વારા પૂરો થાય છે, જેમાંથી મોટાભાગનો પુરવઠો ખાડી દેશો અને હોર્મુઝ જળમાર્ગ મારફતે આવે છે. યુદ્ધના કારણે આ સપ્લાય ચેઇન પર ગંભીર અસર થવાની શક્યતા ઉભી થઈ હતી. પરંતુ કેન્દ્ર સરકારે તાત્કાલિક પગલાં લઈને દેશની વિવિધ રિફાઇનરીઓને LPG ઉત્પાદન વધારવા સૂચના આપી. પરિણામે થોડા જ દિવસોમાં ઉત્પાદન ક્ષમતા નોંધપાત્ર રીતે વધારી શકાઈ હતી.

PNG કનેક્શન વધારી દબાણ ઘટાડાયું
સરકારે માત્ર LPG પર નિર્ભરતા ઘટાડવા માટે PNG કનેક્શનના વિસ્તરણ પર પણ ભાર મૂક્યો. વડાપ્રધાનના જણાવ્યા મુજબ, ટૂંકા ગાળામાં લાખો નવા ઘરોને PNG નેટવર્ક સાથે જોડવામાં આવ્યા, જેના કારણે ગેસ પુરવઠા પરનું દબાણ ઓછું કરવામાં મદદ મળી.

ગેસ સિલિન્ડરના ભાવ નિયંત્રણમાં રાખવાનો દાવો
PM મોદીએ કહ્યું કે આંતરરાષ્ટ્રીય પરિસ્થિતિને જોતા ઘરેલુ ગેસ સિલિન્ડરની કિંમતમાં ભારે વધારો થઈ શકે તેમ હતો, પરંતુ કેન્દ્ર સરકારે અસરકારક વ્યવસ્થાપનથી ભાવને નિયંત્રણમાં રાખ્યા. ઉજ્જવલા યોજનાના લાભાર્થીઓને સબસિડીયુક્ત દરે ગેસ ઉપલબ્ધ કરાવવાની પણ વાત તેમણે કરી.

વિરોધ પક્ષ પર આડકતરો નિશાન
ભાષણ દરમિયાન વડાપ્રધાને કોઈનું નામ લીધા વગર વિરોધ પક્ષ પર નિશાન સાધ્યું. તેમણે કહ્યું કે કેટલીક શક્તિઓ માત્ર અફવાઓ અને આશંકાઓ ફેલાવવામાં વ્યસ્ત હતી, જ્યારે સરકારના વિવિધ વિભાગો દિવસ-રાત મહેનત કરીને દેશને સંકટમાંથી બહાર કાઢવા માટે કામ કરી રહ્યા હતા.

₹1.06 લાખ કરોડના વિકાસ કાર્યોનો શિલાન્યાસ
આ કાર્યક્રમ દરમિયાન વડાપ્રધાન મોદીએ આશરે ₹1.06 લાખ કરોડના વિવિધ વિકાસ પ્રોજેક્ટ્સનું લોકાર્પણ અને શિલાન્યાસ પણ કર્યું. આ પ્રોજેક્ટ્સમાં પેટ્રોકેમિકલ્સ, રેલવે, માર્ગ વ્યવસ્થા, શહેરી પરિવહન, રિન્યુએબલ એનર્જી અને વીજ ટ્રાન્સમિશન સંબંધિત યોજનાઓનો સમાવેશ થાય છે.