Harsh Sanghavi: ગુજરાતના ઉપમુખ્યમંત્રી હર્ષ સંઘવીએ મહિલાઓને શુભકામનાઓ પાઠવતા નારી શક્તિ અંગે મહત્વની વાત કરી હતી. તેમણે જણાવ્યું હતું કે, તેઓ તમામ બહેનોને શુભેચ્છા આપવા માટે ઉપસ્થિત રહ્યા છે અને સમાજમાં મહિલાઓની વધતી ભાગીદારી ગૌરવની બાબત છે.

તેમણે ઐતિહાસિક સંદર્ભ આપતા જણાવ્યું કે, વર્ષ 1919માં અમદાવાદમાં સરદાર વલ્લભભાઈ પટેલે નગરપાલિકામાં મહિલાઓની ભાગીદારી વધારવા માટે મહત્વપૂર્ણ ઠરાવ કર્યો હતો. આ પગલું તે સમય માટે ખૂબ જ પ્રગતિશીલ માનવામાં આવતું હતું.

હર્ષ સંઘવીએ વધુમાં જણાવ્યું કે, વર્ષો બાદ ગુજરાત એવું પહેલું રાજ્ય બન્યું હતું, જ્યાં મહિલાઓ માટે 50 ટકા અનામતનો અમલ કરવામાં આવ્યો હતો. આજે મનપાઓમાં જેટલા પુરુષ કોર્પોરેટર છે એટલી જ સંખ્યામાં મહિલા કોર્પોરેટર પણ કાર્યરત છે.

તેમણે આવનારા સમયમાં રજૂ થનારા ‘નારી શક્તિ વંદન બિલ’ અંગે પણ ઉલ્લેખ કર્યો હતો. તેમણે જણાવ્યું કે આ બિલ આવતીકાલે લોકસભામાં રજૂ થવાનું છે અને તે મહિલાઓના સશક્તિકરણ તરફ એક મહત્વપૂર્ણ પગલું સાબિત થશે. અંતમાં તેમણે વિશ્વાસ વ્યક્ત કર્યો કે, આપણી આગામી પેઢી આ બિલ માટે ચોક્કસપણે આભાર માનશે અને સમાજમાં મહિલાઓની ભૂમિકા વધુ મજબૂત બનશે.