Gold-Silver Rate Today: સોના અને ચાંદીના ભાવમાં મંગળવારે સતત બીજા દિવસે ઘટાડો નોંધાયો છે. બંને કિંમતી ધાતુઓના ભાવમાં આશરે 1.20 ટકા સુધીનો ઘટાડો જોવા મળ્યો છે.

મલ્ટી કોમોડિટી એક્સચેન્જ (MCX) પર 5 ઓગસ્ટ, 2026ના સોનાના કોન્ટ્રાક્ટનો ભાવ અગાઉના બંધ ભાવ રૂ. 1,46,917 પ્રતિ 10 ગ્રામની સરખામણીએ ઘટાડા સાથે રૂ. 1,46,566 પ્રતિ 10 ગ્રામ પર ખુલ્યો હતો.

શરૂઆતના કારોબારમાં જ સોનાના ભાવમાં વધુ નરમાઈ જોવા મળી હતી. સવારે 9:52 વાગ્યે સોનાનો ભાવ રૂ. 1,009 અથવા 0.69 ટકા ઘટીને રૂ. 1,45,908 પ્રતિ 10 ગ્રામ રહ્યો હતો. આજના કારોબાર દરમિયાન સોનાએ રૂ. 1,45,767 પ્રતિ 10 ગ્રામની નીચી સપાટી અને રૂ. 1,46,566 પ્રતિ 10 ગ્રામની ઊંચી સપાટી સ્પર્શી હતી.

ચાંદીના ભાવમાં પણ ઘટાડો નોંધાયો છે. 4 સપ્ટેમ્બર, 2026ના ચાંદીના કોન્ટ્રાક્ટનો ભાવ અગાઉના બંધ ભાવ રૂ. 2,36,099 પ્રતિ કિલોગ્રામની સરખામણીએ રૂ. 1,999ના ઘટાડા સાથે રૂ. 2,34,100 પ્રતિ કિલોગ્રામ પર ખુલ્યો હતો.

શરૂઆતના કારોબાર બાદ ચાંદીમાં વધુ વેચવાલી જોવા મળી હતી. સવારે તેનો ભાવ રૂ. 2,816 અથવા 1.19 ટકા ઘટીને રૂ. 2,33,283 પ્રતિ કિલોગ્રામ રહ્યો હતો. આજના કારોબાર દરમિયાન ચાંદીનો સૌથી નીચો ભાવ રૂ. 2,32,862 પ્રતિ કિલોગ્રામ અને સૌથી ઊંચો ભાવ રૂ. 2,34,100 પ્રતિ કિલોગ્રામ નોંધાયો હતો.

આંતરરાષ્ટ્રીય બજારમાં પણ સોના અને ચાંદીમાં વેચવાલીનો માહોલ જોવા મળ્યો હતો. સમાચાર લખાઈ રહ્યા હતા ત્યારે કોમેક્સ (COMEX) પર સોનાનો ભાવ 0.63 ટકા ઘટીને 4,141 ડોલર પ્રતિ ઔંસ અને ચાંદીનો ભાવ 1.46 ટકા ઘટીને 61.41 ડોલર પ્રતિ ઔંસ રહ્યો હતો.

આ ઉપરાંત રેટિંગ એજન્સી ક્રિસિલના તાજેતરના અહેવાલ અનુસાર, ચાલુ નાણાકીય વર્ષ (FY27)ના એપ્રિલથી જૂન દરમિયાન ગોલ્ડ લોન સૌથી મોટી સુરક્ષિત એસેટ ક્લાસ તરીકે ઉભરી આવી છે અને તેણે વાહન લોનને પણ પાછળ છોડી છે.

અહેવાલ મુજબ ચાલુ નાણાકીય વર્ષની પ્રથમ ત્રિમાસિક ગાળામાં જાહેર કરાયેલી તમામ સુરક્ષિત લોનમાં ગોલ્ડ લોનનો હિસ્સો વધીને આશરે 31 ટકા થયો છે, જ્યારે વાહન લોનનો હિસ્સો ઘટીને લગભગ 26 ટકા રહ્યો છે.