CBSE New Chairman: લોખંડે પ્રશાંત સીતારામ CBSEના નવા અધ્યક્ષ બનશે. કેન્દ્ર સરકારે આજે તેમની નિમણૂકને મંજૂરી આપી છે. 12મા ધોરણની પરીક્ષાઓના સંચાલન, મૂલ્યાંકન પ્રક્રિયામાં વ્યવહારુ અને તકનીકી મુશ્કેલીઓ અને જવાબદારી સંબંધિત પ્રશ્નોના નિરાકરણ માટે આ એક મોટી સરકારી કાર્યવાહી હતી. ભૂતપૂર્વ અધ્યક્ષ રાહુલ સિંહ અને CBSE સચિવ હિમાંશુ ગુપ્તાને દૂર કર્યા પછી સરકારે IAS લોખંડે પ્રશાંત સીતારામને CBSEના નવા અધ્યક્ષ તરીકે નિયુક્ત કર્યા છે.

લોખંડે પ્રશાંત સીતારામ હાલ ગૃહ મંત્રાલયમાં અધિક સચિવ તરીકે કામ કરી રહ્યા છે. તેમણે બીઈ મિકેનિકલ એન્જિનિયરિંગની પરીક્ષા પાસ કરી છે. તેઓ AGMUT કેડરના IAS છે અને તેમનું ગૃહ રાજ્ય મહારાષ્ટ્ર છે.

આ ઉપરાંત વરુણ ભારદ્વાજ CBSEના નવા સચિવ બનશે. આ સાથે CBSE દ્વારા ઓન-સ્ક્રીન માર્કિંગ (OSM) સેવાઓની ખરીદી પ્રક્રિયાની તપાસ માટે એક વિશેષ તપાસ સમિતિની રચના કરવામાં આવી છે.

એસ. રાધા ચૌહાણ સમિતિના અધ્યક્ષ રહેશે
સૂત્રોના જણાવ્યા અનુસાર, આ તપાસ સમિતિ OSM સેવાઓની ખરીદી, ટેન્ડર પ્રક્રિયા અને વિવિધ સંબંધિત પાસાઓની તપાસ કરશે. જાહેર કરાયેલા આદેશ મુજબ, તપાસ સમિતિનું નેતૃત્વ ક્ષમતા નિર્માણ આયોગના અધ્યક્ષ એસ. રાધા ચૌહાણ કરશે. આ સમિતિને OSM સિસ્ટમ માટે CBSEની સેવાઓની ખરીદી સંબંધિત તમામ બાબતોની તપાસ કરવાનું કામ સોંપવામાં આવ્યું છે.

જરૂર પડે તો અન્ય અધિકારીઓની પણ મદદ લઈ શકાય
સરકારી આદેશમાં જણાવાયું છે કે, સમિતિના અધ્યક્ષ એસ.રાધા ચૌહાણ, જો જરૂરી હોય તો અન્ય વિભાગો અને કચેરીઓના અધિકારીઓ પાસેથી મદદ લઈ શકશે. ક્ષમતા નિર્માણ સમિતિ દ્વારા સચિવાલય સહાય પૂરી પાડવામાં આવશે.