મુંબઈ: અગાઉના ટ્રેડિંગ સેશનમાં ભારે ઘટાડા બાદ ભારતીય શેરબજારે ગુરુવારે જોરદાર કમબેક કર્યું હતું. દિવસના અંતે BSE સેન્સેક્સ 238.22 અંકના વધારા સાથે 76,741.82 પર, જ્યારે NSE નિફ્ટી 80.75 અંકની તેજી સાથે 23,962.80 પર બંધ થયો હતો. નિફ્ટી દિવસ દરમિયાન 24,000ના મહત્વના સ્તરની નજીક પહોંચ્યો હતો.

બજારમાં દિવસભર ખરીદારીનું વાતાવરણ જોવા મળ્યું. સેન્સેક્સ ઇન્ટ્રા-ડે દરમિયાન 823 અંકથી વધુ ઉછળીને 77,326 સુધી પહોંચ્યો હતો, જ્યારે નિફ્ટી પણ 24,134ના દિવસના ઉચ્ચતમ સ્તરે પહોંચ્યો હતો. વ્યાપક બજારમાં પણ મજબૂત તેજી જોવા મળી હતી. નિફ્ટી મિડકેપ ઇન્ડેક્સમાં 1.38 ટકા અને સ્મોલકેપ ઇન્ડેક્સમાં 1.80 ટકાનો વધારો નોંધાયો હતો. બજારમાં કુલ 2,793 શેરોમાં તેજી, 1,263 શેરોમાં ઘટાડો અને 167 શેરો યથાવત રહ્યા હતા.

સેક્ટરલ ઇન્ડેક્સમાં રિયલ્ટી સેક્ટરે 3.5 ટકાની તેજી સાથે સૌથી વધુ વધારો નોંધાવ્યો, જ્યારે મીડિયા, PSU બેંક અને કન્ઝ્યુમર ડ્યુરેબલ્સ શેરોમાં પણ ખરીદી જોવા મળી હતી. બીજી તરફ IT અને ઓટો સેક્ટરના શેરોમાં મર્યાદિત નબળાઈ નોંધાઈ હતી. નિફ્ટી-50માં સન ફાર્મા, ભારતી એરટેલ, બજાજ ફિનસર્વ, ઇન્ડિગો, ગ્રાસિમ અને કોટક મહિન્દ્રા બેંકના શેરોએ સારું પ્રદર્શન કર્યું હતું. જ્યારે ડૉ. રેડ્ડીઝ લેબોરેટરીઝ, મારુતિ સુઝુકી, ONGC, ઇન્ફોસિસ, NTPC અને હિન્ડાલ્કોના શેરોમાં ઘટાડો નોંધાયો હતો.

બજારમાં આવેલી તેજીથી રોકાણકારોને એક જ દિવસમાં ₹5 લાખ કરોડથી વધુનો ફાયદો થયો હતો. BSEમાં લિસ્ટેડ કંપનીઓનું કુલ માર્કેટ કેપિટલાઇઝેશન વધીને ₹476.4 લાખ કરોડ સુધી પહોંચી ગયું હતું. આ દરમિયાન ભારતીય રૂપિયો પણ મજબૂત બન્યો હતો. ડોલર સામે રૂપિયો 17 પૈસા મજબૂત થઈ 95.38 પર બંધ થયો હતો.

બજાર નિષ્ણાતોના જણાવ્યા અનુસાર, આંતરરાષ્ટ્રીય નાણાં ભંડોળ (IMF) દ્વારા ભારત અંગે વ્યક્ત કરાયેલા સકારાત્મક અભિપ્રાયથી પણ બજારને ટેકો મળ્યો હતો. IMFએ જણાવ્યું છે કે પડકારજનક વૈશ્વિક પરિસ્થિતિ છતાં ભારત વિશ્વની સૌથી ઝડપી વિકસતી મોટી અર્થવ્યવસ્થાઓમાં સ્થાન જાળવી રાખશે. જોકે FY 2026-27 માટે GDP વૃદ્ધિનો અંદાજ 6.5 ટકાથી ઘટાડીને 6.4 ટકા કરવામાં આવ્યો છે, પરંતુ મધ્યમ ગાળાની વૃદ્ધિ અંગે વિશ્વાસ યથાવત હોવાનું પણ IMFએ જણાવ્યું છે.