Samsung Layoff 2026: અમેરિકામાં સેમસંગે 800 કર્મચારીઓની છટણી કરી, જાણો કારણ

નવી દિલ્હી: વૈશ્વિક ટેક કંપની સેમસંગ (Samsung) એ અમેરિકામાં મોટા પાયે કર્મચારીઓની છટણી કરીને ટેક જગતમાં ચકચાર મચાવી છે. અહેવાલો અનુસાર કંપનીએ અમેરિકાના વિવિધ ઓફિસોમાંથી આશરે 800 કર્મચારીઓને નોકરીમાંથી હટાવ્યા છે.

કંપનીએ સ્પષ્ટ કર્યું છે કે આ નિર્ણય આર્થિક મંદી કે વ્યવસાયમાં નુકસાનને કારણે લેવામાં આવ્યો નથી. સેમસંગ પોતાના અમેરિકન કન્ઝ્યુમર ઇલેક્ટ્રોનિક્સ હેડક્વાર્ટરને ન્યૂ જર્સીથી ટેક્સાસના પ્લાનો (Plano) શહેરમાં સ્થળાંતર કરી રહી છે. તમામ ટીમોને એક સ્થળે લાવવાથી કામગીરીમાં વધુ સંકલન અને ઝડપી નિર્ણય લેવામાં મદદ મળશે તેવું કંપનીનું માનવું છે. અહેવાલો મુજબ, કંપનીના મોબાઇલ, ડિસ્પ્લે અને કન્ઝ્યુમર ઇલેક્ટ્રોનિક્સ વિભાગમાં કાર્યરત કર્મચારીઓ પર સૌથી વધુ અસર પડી છે. ન્યૂ જર્સી ઓફિસના લગભગ 739 પદો આ ફેરફારથી પ્રભાવિત થયા છે, જ્યારે પ્લાનો ઓફિસમાં પણ અંદાજે 100 કર્મચારીઓને છૂટા કરવામાં આવ્યા છે.

સેમસંગે જણાવ્યું છે કે જે કર્મચારીઓની નવી વ્યવસ્થામાં જરૂર છે તેમને ટેક્સાસમાં ટ્રાન્સફર થવાનો વિકલ્પ આપવામાં આવ્યો છે. જોકે, સ્થળાંતર શક્ય ન હોય અથવા જે પદોની હવે જરૂર ન રહી હોય તેવા કર્મચારીઓને કંપની છોડવી પડી રહી છે. છેલ્લા કેટલાક મહિનાઓથી ટેક ઉદ્યોગમાં ખર્ચ ઘટાડવા માટે મોટા પાયે છટણીનો ટ્રેન્ડ જોવા મળી રહ્યો છે. સેમસંગ પહેલાં માઇક્રોસોફ્ટ, મેટા સહિત અનેક મોટી કંપનીઓ પણ હજારો કર્મચારીઓને છૂટા કરી ચૂકી છે. હવે આ યાદીમાં સેમસંગનું નામ પણ ઉમેરાયું છે.