India Engineering Exports Record: ભારતના એન્જિનિયરિંગ ઉત્પાદનોની નિકાસે મે 2026 દરમિયાન ઐતિહાસિક સિદ્ધિ નોંધાવી છે. પ્રથમ વખત દેશની એન્જિનિયરિંગ નિકાસ 12.31 અબજ ડોલર સુધી પહોંચી છે. ગયા વર્ષની સરખામણીએ આ નિકાસમાં 24.48 ટકા વૃદ્ધિ નોંધાઈ છે. વૈશ્વિક વેપારના પડકારો અને પશ્ચિમ એશિયામાં ચાલી રહેલા ભૂરાજકીય તણાવ છતાં ભારતે આ નોંધપાત્ર સિદ્ધિ મેળવી છે. સરકારી આંકડા મુજબ, મે 2025માં એન્જિનિયરિંગ નિકાસ 9.89 અબજ ડોલર હતી, જે હવે વધીને 12.31 અબજ ડોલર થઈ ગઈ છે. કુલ માલ નિકાસમાં એન્જિનિયરિંગ ક્ષેત્રનો હિસ્સો હવે 27.2 ટકા સુધી પહોંચી ગયો છે.

આ વૃદ્ધિમાં ખાસ કરીને ઇલેક્ટ્રિક મશીનરી, ઇલેક્ટ્રિકલ સાધનો, મોટર વાહનો, જહાજો, ફ્લોટિંગ સ્ટ્રક્ચર્સ તેમજ લોખંડ અને સ્ટીલ ઉત્પાદનોના નિકાસમાં થયેલા વધારાનો મોટો ફાળો રહ્યો છે. EEPC ઇન્ડિયાના જણાવ્યા મુજબ, મે મહિનામાં એન્જિનિયરિંગ ક્ષેત્રની 34માંથી 28 કેટેગરીમાં સકારાત્મક વૃદ્ધિ નોંધાઈ છે, જે ભારતના મેન્યુફેક્ચરિંગ અને નિકાસ ક્ષેત્ર માટે સારા સંકેત માનવામાં આવે છે.

EEPC ઇન્ડિયાના ચેરમેન પંકજ ચઢ્ઢાએ જણાવ્યું કે વૈશ્વિક કંપનીઓ હવે સપ્લાય ચેઇનમાં ચીન પરની નિર્ભરતા ઘટાડીને નવા વિકલ્પો શોધી રહી છે, જેના કારણે ભારતીય કંપનીઓ માટે નવી તકો ઉભી થઈ રહી છે. તેમણે વેપાર માટે સરળ નીતિઓ, સસ્તું ટ્રેડ ફાઇનાન્સ અને જોખમ સુરક્ષા જેવી સહાય વધારવાની પણ માંગ કરી છે. તેમણે વિશ્વાસ વ્યક્ત કર્યો કે સરકારના યોગ્ય માર્ગદર્શન સાથે ભારત 2030 સુધી 250 અબજ ડોલરના એન્જિનિયરિંગ નિકાસના લક્ષ્યને સરળતાથી હાંસલ કરી શકે છે.

પ્રદેશવાર આંકડાઓ મુજબ, ઉત્તર અમેરિકા ભારતના એન્જિનિયરિંગ ઉત્પાદનો માટે સૌથી મોટું બજાર રહ્યું, જ્યાં કુલ નિકાસનો 19.3 ટકા હિસ્સો ગયો. ત્યારબાદ પશ્ચિમ એશિયા અને ઉત્તર આફ્રિકા (16.7%) તથા યુરોપિયન યુનિયન (15.2%)નો ક્રમ રહ્યો. ખાસ વાત એ છે કે પશ્ચિમ એશિયામાં ભૂરાજકીય સંકટ હોવા છતાં આ વિસ્તારમાં ભારતના એન્જિનિયરિંગ નિકાસમાં 44 ટકા સુધીનો ઉછાળો નોંધાયો છે, જે ભારતની વૈશ્વિક વેપાર ક્ષમતાને વધુ મજબૂત બનાવે છે.