નવી દિલ્હી: કર્મચારી ભવિષ્ય નિધિ સંગઠન (EPFO)એ પોતાના યુનિફાઇડ મેમ્બર પોર્ટલમાં મહત્વપૂર્ણ અપગ્રેડ કર્યા બાદ PF ખાતાધારકો માટે કેટલાક નવા નિયમો જાહેર કર્યા છે. સૌથી મોટો ફેરફાર UAN (યુનિવર્સલ એકાઉન્ટ નંબર) એક્ટિવેશન અને નવા UAN જનરેશનને લઈને કરવામાં આવ્યો છે. હવે UAN એક્ટિવેશન અને નવા UAN મેળવવાની સુવિધા EPFOની વેબસાઇટ પર ઉપલબ્ધ નહીં રહે. આ બંને સેવાઓને સરકારની UMANG એપ પર સ્થાનાંતરિત કરવામાં આવી છે. EPFOના જણાવ્યા મુજબ આ નિર્ણય ડિજિટલ સેવાઓને વધુ સુરક્ષિત, ઝડપી અને પારદર્શક બનાવવા માટે લેવામાં આવ્યો છે.

હવે UMANG એપથી જ થશે UAN એક્ટિવેશન
જે PF સભ્યોનું UAN હજુ સુધી એક્ટિવ નથી, તેઓએ UMANG એપ ડાઉનલોડ કરીને પ્રક્રિયા પૂર્ણ કરવી પડશે. એપમાં EPFO Services વિભાગમાં જઈ “UAN Services Through Face Authentication” વિકલ્પ પસંદ કરીને આધાર આધારિત ફેસ ઓથેન્ટિકેશન પૂર્ણ કરવું પડશે. ત્યારબાદ સ્ક્રીન પર દર્શાવેલ સૂચનાઓ અનુસાર પ્રક્રિયા પૂર્ણ થતા UAN સક્રિય થઈ જશે.

નવા UAN માટે પણ UMANG એપ ફરજિયાત
EPFOએ વેબસાઇટ પરથી નવા UAN જનરેટ કરવાની સુવિધા પણ હટાવી દીધી છે. હવે નવા કર્મચારીઓ અથવા જેમને UAN મળ્યો નથી તેઓ UMANG એપ મારફતે જ UAN મેળવી શકશે. સફળ વેરિફિકેશન બાદ નવો UAN જારી કરવામાં આવશે અને તેને EPF ખાતા સાથે લિંક કરવામાં આવશે.

UAN ભૂલી ગયા હો તો પણ સરળ પ્રક્રિયા
EPFOએ UAN રિકવરીની પ્રક્રિયાને પણ સરળ બનાવી છે. સભ્યોએ પોતાનો રજિસ્ટર્ડ મોબાઇલ નંબર દાખલ કરીને ઓળખ અને સરનામા સંબંધિત દસ્તાવેજ અપલોડ કરવા પડશે. OTP વેરિફિકેશન પૂર્ણ થયા બાદ UAN ફરીથી મેળવી શકાશે.

ડેથ ક્લેમ સેવા યથાવત રહેશે
જોકે UAN સંબંધિત મોટાભાગની સેવાઓ UMANG એપ પર ખસેડવામાં આવી છે, પરંતુ ઓનલાઈન ડેથ ક્લેમ દાખલ કરવાની સુવિધા હજુ પણ EPFOના યુનિફાઇડ મેમ્બર પોર્ટલ પર ઉપલબ્ધ રહેશે.

શરૂઆતમાં ક્લેમ પ્રક્રિયામાં વિલંબ શક્ય
EPFOએ જણાવ્યું છે કે નવા અપગ્રેડ બાદ પ્રથમ બે સપ્તાહ દરમિયાન ક્લેમ અને ઓનલાઈન અરજીઓના નિકાલમાં થોડો વધુ સમય લાગી શકે છે. વધારાની ચકાસણી અને ટેક્નિકલ પ્રક્રિયાઓને કારણે આ વિલંબ થઈ શકે છે. સભ્યોને એક જ અરજી વારંવાર સબમિટ ન કરવાની સલાહ પણ આપવામાં આવી છે. EPFOના મતે ફેસ ઓથેન્ટિકેશન આધારિત નવી સિસ્ટમથી છેતરપિંડીના બનાવોમાં ઘટાડો થશે અને PF ખાતાધારકોને વધુ સુરક્ષિત તેમજ ઝડપી ડિજિટલ સેવાઓ મળશે.