અમરનાથ યાત્રામાં 11 દિવસમાં 2.75 લાખથી વધુ શ્રદ્ધાળુઓએ કર્યા દર્શન, અકસ્માત છતાં યાત્રા યથાવત

અમરનાથ યાત્રા 2026માં શ્રદ્ધાળુઓનો ઉત્સાહ સતત વધતો જઈ રહ્યો છે. 3 જુલાઈથી શરૂ થયેલી આ પવિત્ર યાત્રામાં અત્યાર સુધી 11 દિવસમાં 2.75 લાખથી વધુ શ્રદ્ધાળુઓએ પવિત્ર ગુફામાં બાબા બરફાણીના દર્શન કર્યા છે. મંગળવારે વધુ 5,335 યાત્રાળુઓનો જથ્થો જમ્મુના ભગવતી નગર યાત્રી નિવાસથી કડક સુરક્ષા વ્યવસ્થા વચ્ચે કાશ્મીર તરફ રવાના થયો હતો.

અધિકારીઓના જણાવ્યા અનુસાર, નવા જથ્થામાંથી 3,599 યાત્રાળુઓ પહેલગામના નુનવાન બેઝ કેમ્પ તરફ જ્યારે 1,736 યાત્રાળુઓ બાલટાલ બેઝ કેમ્પ તરફ ગયા છે. સોમવારે એક જ દિવસે 24,259 શ્રદ્ધાળુઓએ પવિત્ર ગુફા મંદિરમાં દર્શન કર્યા હતા.

આ દરમિયાન સોમવારે જમ્મુ-શ્રીનગર નેશનલ હાઇવે પર રામબન જિલ્લાના ચંદરકોટ નજીક યાત્રીઓના કાફલામાં સામેલ બસના બ્રેક ફેલ થતાં અકસ્માત સર્જાયો હતો. બસ બીજી બસ અને રસ્તા પર ઉભેલી કાર સાથે અથડાતા કુલ 18 યાત્રાળુઓને સામાન્ય ઇજાઓ પહોંચી હતી, જ્યારે બસ ચાલક ગંભીર રીતે ઘાયલ થયો હતો. તમામ ઘાયલોને તાત્કાલિક રામબન જિલ્લા હોસ્પિટલમાં સારવાર માટે ખસેડવામાં આવ્યા હતા. પ્રાથમિક સારવાર બાદ તમામ યાત્રાળુઓને રજા આપવામાં આવી હતી, જ્યારે બસ ચાલકની સારવાર ચાલુ છે.

જિલ્લા પ્રશાસને અસરગ્રસ્ત યાત્રાળુઓ માટે વૈકલ્પિક વાહનોની વ્યવસ્થા કરી, જેથી તેઓ વિલંબ વિના પોતાની યાત્રા આગળ વધારી શકે. અકસ્માતને કારણે હાઇવે પર થોડા સમય માટે યાત્રા કાફલાની અવરજવર રોકાઈ હતી, પરંતુ નુકસાનગ્રસ્ત વાહનો હટાવી ટ્રાફિક ઝડપથી પુનઃસ્થાપિત કરવામાં આવ્યો હતો.

57 દિવસીય અમરનાથ યાત્રા 28 ઓગસ્ટે શ્રાવણ પૂર્ણિમા અને રક્ષાબંધનના પાવન અવસરે પૂર્ણ થશે. 3,880 મીટરની ઊંચાઈએ આવેલી પવિત્ર ગુફામાં કુદરતી રીતે બનતું બરફનું શિવલિંગ ભગવાન શિવનું પ્રતિક માનવામાં આવે છે અને દેશભરમાંથી લાખો શ્રદ્ધાળુઓ અહીં દર્શન માટે પહોંચે છે.