નવી દિલ્હી તાજેતરમાં દિલ્હી સરકારે સરકારી કચેરીઓમાં અઠવાડિયામાં બે દિવસ વર્ક ફ્રોમ હોમ (WFH) લાગુ કરવાનો નિર્ણય લીધો છે. મુખ્યમંત્રી રેખા ગુપ્તાએ જણાવ્યું છે કે હવે સરકારી કચેરીઓમાં ઓછામાં ઓછું 50% સ્ટાફ હાજર રહેશે, જ્યારે બાકી કર્મચારીઓને બે દિવસ સુધી ઘરેથી કામ કરવાની મંજૂરી આપવામાં આવશે.

આ ઉપરાંત, દિલ્હી સરકાર ખાનગી કંપનીઓને પણ વર્ક ફ્રોમ હોમને પ્રોત્સાહન આપવા અપીલ કરશે. કર્મચારીઓના પેટ્રોલ અને ડીઝલ ભથ્થામાં 20% ઘટાડો કરવાનો નિર્ણય પણ લેવામાં આવ્યો છે. દર સોમવારને ‘મંડે મેટ્રો ડે’ તરીકે અમલમાં લાવવામાં આવશે, જેમાં અધિકારીઓને મેટ્રો દ્વારા ઓફિસ આવવા પ્રોત્સાહિત કરવામાં આવશે. સરકારી કોલોનીઓથી મેટ્રો સ્ટેશનો સુધી પહોંચાડવા માટે 58 બસોની વ્યવસ્થા પણ કરવામાં આવશે.

કેન્દ્ર સરકારના પર્સનલ અને ટ્રેનિંગ વિભાગ હેઠળના ‘કેપેસિટી બિલ્ડિંગ કમિશન (CBC)’ દ્વારા પણ નવી માર્ગદર્શિકા જારી કરવામાં આવી છે. આ મુજબ:

વિભાગીય વડાઓ તેમના સ્ટાફ માટે અઠવાડિયામાં વધુમાં વધુ બે દિવસ વર્ક ફ્રોમ હોમનો રોસ્ટર બનાવી શકશે ઓફિસમાં ઓછામાં ઓછા 50% કર્મચારીઓની હાજરી ફરજિયાત રહેશે ઘરેથી કામ કરનાર કર્મચારીઓ સતત ફોન પર ઉપલબ્ધ રહેશે અને જરૂર પડે ત્યારે ઓફિસ આવવું પડશે ઓફલાઇન મીટિંગ, વર્કશોપ અને કોન્ફરન્સ પર પ્રતિબંધ મૂકીને ઓનલાઈન મીટિંગને પ્રાથમિકતા આપવામાં આવશે કર્મચારીઓને અનાવશ્યક પ્રવાસ ટાળવા સૂચના આપવામાં આવી છે

અન્ય રાજ્યોમાં પણ સમાન પગલાં લેવામાં આવ્યા છે. ત્રિપુરામાં ગ્રુપ C અને Dના માત્ર 50% કર્મચારીઓ જ રોજ ઓફિસ આવશે, જ્યારે બાકી વર્ક ફ્રોમ હોમ કરશે.

આંધ્ર પ્રદેશના મુખ્યમંત્રી ચંદ્રબાબુ નાયડુ અને ગોવાના મુખ્યમંત્રી પ્રમોદ સાવંતે પોતાના કાફલામાં વાહનોની સંખ્યા 50% સુધી ઘટાડવાનો નિર્ણય કર્યો છે.

પંજાબમાં ગવર્નર ઓફિસે દર બુધવારે અધિકારીઓને ગાડી વગર આવવા સૂચના આપી છે, જ્યારે હરિયાણામાં મુખ્યમંત્રી નાયબ સિંહ સૈની અઠવાડિયામાં એક દિવસ સરકારી વાહનનો ઉપયોગ નહીં કરે.

આ પહેલા દિલ્હી સહિત અનેક રાજ્યોમાં VVIP કાફલામાં વાહનોની સંખ્યા પહેલેથી જ ઘટાડવામાં આવી હતી. વડાપ્રધાન મોદી પણ બુધવારે માત્ર બે વાહનોના કાફલા સાથે બહાર નીકળ્યા હતા, જ્યારે સામાન્ય રીતે તેમના કાફલામાં 12થી 15 વાહનો સામેલ હોય છે.