Myanmar President India Visit: ભારતના વડાપ્રધાન નરેન્દ્ર મોદીએ સોમવારે નવી દિલ્હીમાં મ્યાનમારના રાષ્ટ્રપતિ યુ મિન આંગ હ્લાઈંગ સાથેની વાતચીત દરમિયાન દક્ષિણ-પૂર્વ એશિયાઈ દેશમાં સક્રિય ભારતીય વિદ્રોહી જૂથોની પ્રવૃત્તિઓનો મુદ્દો ઉઠાવ્યો હતો. રાષ્ટ્રપતિ હ્લાઈંગે વિશ્વાસ વ્યક્ત કર્યો કે, મ્યાનમારની જમીનનો ઉપયોગ ભારતના સુરક્ષા હિતો વિરુદ્ધ થવા દેવામાં નહીં આવે.

બંને નેતાઓની મુલાકાત બાદ વિદેશ સચિવ વિક્રમ મિસરીએ પત્રકારોને સંબોધન કરતા જણાવ્યું કે, મ્યાનમારના રાષ્ટ્રપતિએ ભારતની ચિંતાઓને દૂર કરવાની પોતાની પ્રતિબદ્ધતા પુનરાવર્તિત કરી છે અને નવી દિલ્હીને આશ્વાસન આપ્યું છે કે, આવા જૂથોને ભારતની સુરક્ષાને ખતરો બનતા અટકાવવા માટે જરૂરી પગલાં લેવામાં આવશે.

વિદેશ સચિવ મિસરીએ કહ્યું કે, ‘મ્યાનમારમાં અમારી સરહદોની નજીક ભારતીય વિદ્રોહી જૂથોની પ્રવૃત્તિઓનો ખૂબ જ મહત્વપૂર્ણ મુદ્દો છે અને આ વાત વડાપ્રધાને ફરીથી રાષ્ટ્રપતિ સમક્ષ ઉઠાવી હતી. રાષ્ટ્રપતિએ ફરી એકવાર વિશ્વાસ વ્યક્ત કર્યો કે મ્યાનમાર આ ચિંતાઓ પ્રત્યે સંવેદનશીલ છે અને તે સુનિશ્ચિત કરવા માટે દરેક જરૂરી પગલું ભરશે કે આવા જૂથો સામે કાર્યવાહી થાય અને તેઓ ભારતની સુરક્ષા માટે ખતરો ન બને.’

મ્યાનમારની આંતરિક સ્થિતિ અંગે પ્રશ્નોના જવાબ આપતા મિસરીએ દક્ષિણ-પૂર્વ એશિયાઈ દેશમાં સેના અને જાતિગત સશસ્ત્ર જૂથો વચ્ચે ચાલી રહેલી ટકરામણ પર ભાર મૂક્યો. આ સાથે જ તેમણે મ્યાનમારના અધિકારીઓ દ્વારા વિવિધ પક્ષો વચ્ચે સંવાદને પ્રોત્સાહન આપવાના પ્રયાસોનો ઉલ્લેખ કર્યો જેથી રાષ્ટ્રીય સહમતિ બની શકે.

તેમણે કહ્યું કે, ‘આંતરિક સુરક્ષાનો બીજો પાસો એ છે કે, મ્યાનમાર સરકાર તમામ જાતિગત સશસ્ત્ર સંગઠનો અને જૂથોને શાંતિ પ્રક્રિયા આગળ વધારવા માટે એક જ મંચ પર લાવવાનો પ્રયાસ કરી રહી છે. તેનો ઉદ્દેશ એવો છે કે, મ્યાનમારમાં વર્તમાન શાસન માળખામાં કે સરકારની વ્યવસ્થામાં શું ફેરફાર જરૂરી છે તે સમજાઈ શકે અને તેના આધારે વ્યાપક રાષ્ટ્રીય સહમતિ બનાવી શકાય.’

મ્યાનમારમાં શાંતિ અને સ્થિરતાના મોટા પ્રાદેશિક મહત્વ પર ભાર મૂકતા મિસરીએ જણાવ્યું કે, ત્યાંના વિકાસનો અસર માત્ર ભારતની સુરક્ષા અને કનેક્ટિવિટી હિતો પર જ નહીં, પરંતુ ASEANની એકતા પર પણ પડે છે, જેમાં મ્યાનમાર એક મહત્વપૂર્ણ સભ્ય છે.

તેમણે કહ્યું કે, ‘મ્યાનમારમાં સ્થિરતા અને શાંતિ ભારત માટે અત્યંત મહત્વપૂર્ણ છે. આ માત્ર આપણા ઉત્તર-પૂર્વ વિસ્તારની સુરક્ષા અને મ્યાનમાર સાથેની 1643 કિમી લાંબી સરહદ પર રહેતા લોકોની સુરક્ષા માટે જ નહીં, પરંતુ દક્ષિણ-પૂર્વ એશિયા સાથેના જોડાણ (કનેક્ટિવિટી) માટે પણ જરૂરી છે. મ્યાનમારમાં સુરક્ષા અને સ્થિરતા ASEANની એકતા માટે પણ મહત્વપૂર્ણ છે. કારણ કે, મ્યાનમાર ASEAN માળખામાં એક મોટો અને મહત્વપૂર્ણ દેશ છે.’