દ્વારકા: રિલાયન્સ ઇન્ડસ્ટ્રીઝના ચેરમેન મુકેશ અંબાણી અને અનંત અંબાણીએ દ્વારકા નજીક આવેલા પ્રસિદ્ધ નાગેશ્વર જ્યોતિર્લિંગ મંદિર ખાતે પહોંચી ભગવાન શિવના દર્શન કર્યા હતા. બંનેએ શાસ્ત્રોક્ત વિધિ મુજબ આરતી અને વિશેષ પૂજન-અર્ચન કરીને આશીર્વાદ મેળવ્યા હતા.

તાજેતરમાં જ અનંત અંબાણીનો જન્મદિવસ ઉજવાયા બાદ તેઓ પરિવાર સાથે ધાર્મિક પ્રવાસે નીકળ્યા હોવાનું જાણવા મળ્યું છે. આ દરમિયાન તેમણે નાગેશ્વર મહાદેવ મંદિર પહોંચીને ભક્તિભાવ સાથે દર્શન કર્યા અને દેશ-વિદેશમાં સુખ-સમૃદ્ધિની કામના કરી હતી.

મંદિર પરિસરમાં અંબાણી પરિવાર દ્વારા કરવામાં આવેલી આરતી અને પૂજન દરમિયાન ભક્તિપૂર્ણ માહોલ જોવા મળ્યો હતો. દર્શન બાદ તેઓએ મંદિરના મહિમા વિશે માહિતી મેળવી અને ધાર્મિક પરંપરાઓ પ્રત્યે પોતાની આસ્થા વ્યક્ત કરી હતી.

અંબાણી પરિવારના આ ધાર્મિક પ્રવાસના ફોટા અને વિડિયો સોશિયલ મીડિયા પર પણ ઝડપથી વાયરલ થઈ રહ્યા છે, જેમાં તેમની શ્રદ્ધા અને ભક્તિભાવ સ્પષ્ટ જોવા મળે છે.