Kerala BJP won 3 Seat: કેરળના રાજકારણમાં આજે એક નવો ઇતિહાસ રચાયો છે. વિધાનસભા ચૂંટણીના પરિણામોએ સ્પષ્ટ કરી દીધું છે કે, ભાજપ હવે રાજ્યમાં માત્ર ‘વોટ કાપનારો’ પક્ષ નથી, પરંતુ એક નિર્ણાયક શક્તિ બની ગયો છે. કેરળમાં ભાજપે ત્રણ બેઠકો જીતી છે. રાજીવ ચંદ્રશેખરે 4,900થી વધુ મતોના માર્જિનથી જીત મેળવી ઇતિહાસ રચ્યો છે. આ દરમિયાન ભાજપના ઉમેદવાર બી.બી. ગોપાકુમારે કોલ્લમ જિલ્લાની ચથન્નુર બેઠક 4,398 મતોના માર્જિનથી જીતી હતી. જ્યારે વી. મુરલીધરને કઝાકુટ્ટમ બેઠક 428 મતોના નાના માર્જિનથી જીત મેળવી છે. આ સાથે ભાજપે ઇતિહાસ રચીને કેરળમાં પહેલીવાર ત્રણ બેઠક જીતી છે.

કેરળ ભાજપ પ્રમુખ રાજીવ ચંદ્રશેખરે જણાવ્યું હતું કે, ભાજપની આગેવાની હેઠળના એનડીએ પાસે હવે રાજ્યમાં ત્રણ ધારાસભ્યો હશે. તેમણે આ જીતને કોંગ્રેસ અને સીપીઆઈ(એમ)ના મોઢા પર સણસણતો તમાચો ગણાવ્યો છે કે, જેઓ દાવો કરતા હતા કે ભાજપ ખાતું પણ નહીં ખોલી શકે.

જનતાએ વિરોધીઓને જવાબ આપ્યોઃ ચંદ્રશેખર
પાર્ટી મુખ્યાલયમાં રાજીવ ચંદ્રશેખરે કહ્યુ હતુ કે, ‘આજે નેમોમ, ચથન્નૂર અને કઝકોટ્ટમના લોકોએ કોંગ્રેસ અને સીપીઆઈ(એમ)ને સ્પષ્ટ જવાબ આપ્યો છે. હવે ભાજપ-એનડીએના વિધાનસભામાં ત્રણ ધારાસભ્યો હશે.’ ચંદ્રશેખરે શરૂઆતમાં આ ચૂંટણીને "સીપીઆઈ(એમ) વિરોધી" ગણાવી હતી. તેમણે કહ્યું કે, લોકો ભ્રષ્ટાચાર અને સબરીમાલા સંબંધિત કથિત મુદ્દાઓથી કંટાળી ગયા છે અને પરિણામો દેખાઈ રહ્યા છે.
 
આંકડાઓમાં ભાજપની લીડ
ચૂંટણી પંચના ડેટા અનુસાર, ભાજપના ઉમેદવાર બીબી ગોપાકુમારે કોલ્લમ જિલ્લાની ચથન્નુર બેઠક 4,398 મતોના માર્જિનથી જીતી હતી. આ દરમિયાન રાજીવ ચંદ્રશેખરે પોતે રાજધાનીની હાઇ-પ્રોફાઇલ નેમોમ બેઠક 4,978થી વધુ મતોથી જીતી હતી. વી. મુરલીધરન પણ કઝકોટ્ટમથી જીત્યા હતા. ચંદ્રશેખરે માત્ર કેરળમાં જ નહીં પરંતુ તમિલનાડુ અને પશ્ચિમ બંગાળ સહિત દેશના અન્ય ભાગોમાં યોજાયેલી ચૂંટણીઓનો ઉલ્લેખ કર્યો હતો. તેમણે કહ્યું કે, પ્રચાર દરમિયાન વિપક્ષે વારંવાર કહ્યું હતું કે ભાજપ એક પણ બેઠક નહીં જીતે, પરંતુ જનતાએ તેમના ગૌરવને તોડી નાખ્યું છે. 

નેમોમ અને ચથન્નુર: ભાજપ માટે પ્રતિષ્ઠાનો પ્રશ્ન 
કેરળના રાજકારણમાં ભાજપ માટે નેમોમ બેઠક મહત્વપૂર્ણ છે. 2016માં ઓ.રાજગોપાલ અહીંથી જીત્યા હતા, જેનાથી કેરળ વિધાનસભામાં પાર્ટીનું ખાતું ખુલ્યું હતું. 2021માં પાર્ટી આ બેઠક ગુમાવી દીધી હોવા છતાં, ભાજપે 2026માં પ્રદેશ પ્રમુખ રાજીવ ચંદ્રશેખરને મેદાનમાં ઉતારીને તેને ફરીથી પ્રતિષ્ઠાનો જંગ બનાવ્યો હતો. બીજી તરફ, કોલ્લમ જિલ્લાની ચથન્નુર બેઠક પર ભાજપનો લાંબા સમયથી આધાર છે. બીબી ગોપાકુમાર અગાઉની ઘણી ચૂંટણીઓથી અહીં સતત પોતાનો મત હિસ્સો વધારી રહ્યા છે અને આ વખતની લીડ સાબિત કરે છે કે આ મતવિસ્તાર હવે ભાજપ માટે ગઢ બની ગયો છે.

કેરળમાં ભાજપ લાંબા સમયથી પોતાને "ત્રીજા ધ્રુવ" તરીકે સ્થાપિત કરવા માટે સંઘર્ષ કરી રહ્યો છે, જ્યાં દાયકાઓથી સ્પર્ધા ફક્ત ડાબેરી LDF અને કોંગ્રેસ UDF વચ્ચે રહી છે. પરંતુ તાજેતરના વર્ષોમાં ખાસ કરીને 2024ની લોકસભા ચૂંટણીમાં સુરેશ ગોપીની જીત અને ત્યારબાદ 2025ની સ્થાનિક સંસ્થાઓની ચૂંટણીમાં તિરુવનંતપુરમ મ્યુનિસિપલ કોર્પોરેશન જેવા મુખ્ય કેન્દ્રોમાં મળેલી સફળતાએ પાર્ટીને નવી ઉર્જા આપી છે. ભાજપ હવે ફક્ત મત કાપનાર નથી; નેમોમ અને ચથન્નૂર જેવી બેઠકો જીતીને દક્ષિણ રાજ્યમાં પોતાને એક મજબૂત વૈચારિક અને ચૂંટણી વિકલ્પ સાબિત કર્યો છે.