નવી દિલ્હી: પ્રધાનમંત્રી નરેન્દ્ર મોદીએ ઇંધણ બચત અને પેટ્રોલ-ડીઝલનો ઉપયોગ ઘટાડવાની અપીલ કર્યા બાદ દેશભરના ભાજપ અને એનડીએના નેતાઓએ જાહેર તથા પર્યાવરણમિત્ર પરિવહનનો ઉપયોગ શરૂ કર્યો છે. સોમવારે અનેક નેતાઓ ઈલેક્ટ્રિક વાહન, સાયકલ અને મેટ્રોમાં મુસાફરી કરીને પ્રધાનમંત્રીની અપીલને સમર્થન આપતા નજરે પડ્યા હતા.

દિલ્હીમાં ભાજપના સાંસદ મનોજ તિવારી અને એનડીએમસીના ઉપાધ્યક્ષ કુલજીત ચહલે ઈલેક્ટ્રિક ઓટોમાં મુસાફરી કરી હતી. ત્યારબાદ તેમણે મેટ્રો ટ્રેનનો ઉપયોગ કર્યો હતો.

ચંડીગઢમાં હરિયાણા સરકારના મંત્રી અરવિંદ કુમાર શર્મા સાયકલ પર પોતાના કાર્યાલય પહોંચ્યા હતા. તેમણે જણાવ્યું કે ઇંધણ બચત માટે પ્રધાનમંત્રીની અપીલનું પાલન કરવું સૌની સામૂહિક જવાબદારી છે. તેમણે લોકોને ટૂંકા અંતર માટે સાયકલ અને જાહેર પરિવહન અપનાવવાની અપીલ કરી હતી.

અરવિંદ કુમાર શર્માએ જણાવ્યું કે, ચંડીગઢમાં રહેઠાણથી કાર્યાલય, સચિવાલય અથવા બેઠક સ્થળ સુધીના પ્રવાસ માટે શક્ય હોય ત્યાં સુધી સાયકલનો ઉપયોગ કરવો જોઈએ, જેથી ઇંધણ બચતના પ્રયાસોમાં યોગદાન આપી શકાય.

હરિયાણાના મંત્રી કૃષ્ણ કુમાર બેદીએ પણ સાયકલથી મુસાફરી કરી હતી. તેમણે કહ્યું કે પ્રધાનમંત્રીની અપીલને યોગ્ય ભાવનાથી અમલમાં મૂકવી જોઈએ અને તેનો સંદેશ લોકો સુધી પહોંચાડવો અમારી જવાબદારી છે.

ઉત્તર પ્રદેશના ઉપમુખમંત્રી બ્રજેશ પાઠકે જણાવ્યું કે પ્રધાનમંત્રીની અપીલને લોકો અને પાર્ટી કાર્યકર્તાઓએ સકારાત્મક પ્રતિસાદ આપ્યો છે. તેમણે જણાવ્યું કે તેમના વાહન કાફલામાં પણ ઘટાડો કરવામાં આવ્યો છે અને જરૂરી હોય ત્યારે ઓછા વાહનોનો ઉપયોગ થઈ રહ્યો છે.

લખનૌમાં ઉત્તર પ્રદેશ સરકારના મંત્રી દાનિશ અંસારી ઈલેક્ટ્રિક કારમાં મુસાફરી કરતા નજરે પડ્યા હતા. તેમણે જણાવ્યું કે રાષ્ટ્રીય સંસાધનોનો મર્યાદિત ઉપયોગ અને પર્યાવરણ સુરક્ષા માટે સૌએ સાથે મળીને પ્રયાસ કરવો જરૂરી છે.

એલજેપી (રામવિલાસ)ના સાંસદ અરુણ ભારતી અને મંત્રી મિથિલેશ તિવારીએ પણ ઇંધણ બચત અને ‘નો વ્હીકલ ડે’ જેવી પહેલને સમર્થન આપતા લોકોને પર્યાવરણમિત્ર પરિવહન અપનાવવાની અપીલ કરી હતી.